Hum se Saeed bin Abi Maryam ne byaan kiya ke hum se Muhammad bin Jafar ne byaan kiya ‘ kaha mujhe Hisham bin Urwah ne khabar di ‘ unhein un ke baap ne aur unhein Aisha razi Allahu anha ne ke ek shakhs ne Nabi Karim salla Allahu alaihi wasallam se poocha ke meri maan ka achanak intiqaal ho gaya aur mera khayal hai ke agar unhein baat karne ka mauqa milta to woh kuch na kuch khairat kartin . Agar main un ki taraf se kuch khairat kar doon to kya unhein is ka sawab mile ga ? Aap salla Allahu alaihi wasallam ne farmaya haan mile ga .

Hum se Muhammad Bin Salam ne bayan kiya, kaha hum ko Makhlad Bin Yazid ne khabar di, unhein Ibn Juraij ne khabar di, kaha ke mujhe Ya'la Bin Muslim ne khabar di, unhon ne Akrimah se suna, wo bayan karte thay ke humein Ibn Abbas (Radi Allahu Anhuma) ne khabar di ke Saad Bin Ubadah (Radi Allahu Anhu) ki maan Amrah Bint-e-Masood ka intiqal hua to wo in ki khidmat mein maujood nahi thay. Unhon ne aa kar Rasul Allah (Sallallahu Alaihi Wasallam) se poocha ya Rasul Allah! Meri walida ka jab intiqal hua to mein in ki khidmat mein hazir nahi tha. Kya agar mein koi cheez sadqa karoon to is se unhein faida pahunch sakta hai? Aap (Sallallahu Alaihi Wasallam) ne isbat mein jawab diya to unhon ne kaha ke mein aap ko gawah banata hoon ke mera Mikhraf nami bagh in ki taraf se sadqa hai
.

Hum se Ismail Bin Abi Uwais ne bayan kiya ' kaha ke mujh se Imam Malik ne bayan kiya ' un se Hisham ne ' un se un ke baap ne aur un se Aisha (Radi Allahu Anha) ne ke ek sahabi (Saad Bin Ubadah) ne Rasul Allah (Sallallahu Alaihi Wasallam) se kaha ke meri walida ki maut achanak waqi ho gayi ' mera khayal hai ke agar unhein guftagu ka moqa milta to wo sadqa kartein to kya mein un ki taraf se khairat kar sakta hoon? Aap (Sallallahu Alaihi Wasallam) ne farmaya haan un ki taraf se khairat kar
.

Hum se Ibrahim Bin Musa ne bayan kiya ' kaha ke hum ko Hisham Bin Yusuf ne khabar di ' unhein Ibn Juraij ne khabar di kaha ke mujhe Ya'la Bin Muslim ne khabar di ' unhon ne Ibn Abbas (Radi Allahu Anhuma) ke ghulam Akrimah se suna aur unhein Ibn Abbas (Radi Allahu Anhuma) ne khabar di ke qabila Bani Sa'idah ke bhai Saad Bin Ubadah (Radi Allahu Anhu) ki maan ka intiqal hua to wo in ki khidmat mein hazir nahi thay (balki Rasul Allah Sallallahu Alaihi Wasallam ke sath ghazwa Domat-ul-Jandal mein shareek thay) is liye wo Aap (Sallallahu Alaihi Wasallam) ke paas aaye aur arz kiya ya Rasul Allah! Meri walida ka intiqal ho gaya hai aur mein is waqt maujood nahi tha to agar mein in ki taraf se khairat karoon to unhein is ka faida pahunche ga? Aap (Sallallahu Alaihi Wasallam) ne farmaya ke haan! Saad (Radi Allahu Anhu) ne is par kaha ke mein aap ko gawah banata hoon ke mera bagh Mikhraf nami in ki taraf se khairat hai
.

Hum se Muhammad Bin Abdur Raheem ne bayan kiya ' kaha hum ko Rauh Bin Ubadah ne khabar di ' kaha hum ko Zakariya Bin Ishaq ne bayan kiya ke mujh se Amr Bin Dinar ne bayan kiya Akrimah se aur unhon ne Ibn Abbas (Radi Allahu Anhuma) se ke ek sahabi Saad Bin Ubadah ne Rasul Allah (Sallallahu Alaihi Wasallam) se poocha ke in ki maan ka intiqal ho gaya hai. Kya agar wo in ki taraf se khairat karein to unhein is ka faida pahunche ga? Aap (Sallallahu Alaihi Wasallam) ne jawab diya ke haan. Is par in sahabi ne kaha ke mera ek pur-mewah bagh hai aur mein aap ko gawah banata hoon ke mein ne wo in ki taraf se sadqa kar diya
.