Hum se Ali bin Abdullah Madini ne byaan kiya ‘ kaha ke hum se Sufyan bin Uyaynah ne byaan kiya ‘ unhon ne kaha ke Ubaydullah bin Ziyad ne byaan kiya ke main ne Abdullah bin Abbas razi Allahu anhuma ko yeh kehte suna tha ke main aur meri waalida (Nabi Karim salla Allahu alaihi wasallam ki hijrat ke baad Makkah mein) kamzor Musalmanon mein se thay . Main bachon mein aur meri waalida auraton mein .

Hum se Abdullah bin Muhammad ne byaan kiya , kaha hum se Sufyan ne byaan kiya , un se Ubaydullah ne byaan kiya ke main ne Ibn Abbas razi Allahu anhuma se suna , unhon ne kaha ke main aur meri walda «mustadafeena» (kamzoron) mein se thay .

Hum se Sulayman bin Harb ne byaan kiya , kaha hum se Hammad bin Zayd ne byaan kiya , un se Ayub ne , un se Ibn Abi Mulaykah ne ke Ibn Abbas razi Allahu anhuma ne aayat «illa-lmustadafeena minar-rijali wan-nisa'i wal wildani» ki tilawat ki aur farmaya ke main aur meri walda bhi in logon mein se thien , jinhein Allah Ta'ala ne mazoor rakkha tha . Aur Ibn Abbas razi Allahu anhuma se riwayat hai ke «hasirat» maani mein «dhaqat» ke hai . «talwoo» yani tumhari zabanon se gawahi ada ho gi . Aur Ibn Abbas razi Allahu anhuma ke siwa doosre shakhs (Abu Ubaydah razi Allahu anhu) ne kaha «muraghaman» ka maani Hijrat ka maqam . Arab log kehte hain «raghamtu qaumi» . Yani main ne apni qaum walon ko jama kar diya . «mauqootan» ke maani ek waqt muqarrara par yani jo waqt un ke liye muqarrar ho .

Hum se Abu al-Nu'man ne byaan kiya , kaha hum se Hammad bin Zayd ne byaan kiya , un se Ayub Sakhtiyani ne , un se Abdullah bin Abi Mulaykah ne aur un se Ibn Abbas razi Allahu anhuma ne «illa-lmustadafeena» ke mutalliq farmaya ke meri maan bhi in hi logon mein thien jinhein Allah ne mazoor rakkha tha .