Hum se Ali bin Abdullah Madini ne byaan kiya ‘ kaha ke hum se Saeed bin Aamir ne byaan kiya ‘ un se Shubah ne ‘ un se Ibn Abi Najeeh ne ‘ un se Ata bin Abi Rabah aur un se Jabir razi Allahu anhu ne byaan kiya ke mere baap ke saath ek hi qabr mein ek aur sahabi (Jabir razi Allahu anhu ke chacha) dafan thay . Lekin mera dil is par raazi nahin ho raha tha . Is liye main ne un ki laash nikal kar doosri qabr mein dafan kar di .

Hum se Musaddad ne byaan kiya ‘ kaha ke hum ko Bishr bin Mufaddal ne khabar di ‘ kaha ke hum se Husayn Mualim ne byaan kiya ‘ un se Ata bin Abi Rabah ne ‘ un se Jabir razi Allahu anhu ne byaan kiya ke jab jang-e-Uhud ka waqt qareeb aa gaya to mujhe mere baap Abdullah ne raat ko bula kar kaha ke mujhe aisa dikhayi deta hai ke Nabi Karim salla Allahu alaihi wasallam ke ashaab mein sab se pehla maqtool main hi hoon ga aur dekho Nabi Karim salla Allahu alaihi wasallam ke siwa doosra koi mujhe (apne azeezon aur waarisoon mein) tum se zyada azeez nahin hai ‘ main maqrooz hoon is liye tum mera qarz ada kar dena aur apni (nau) behenon se achha sulook karna . Chunanche jab subah hui to sab se pehle mere waalid hi shaheed huay . Qabr mein Aap ke saath main ne ek doosre shakhs ko bhi dafan kiya tha . Par mera dil nahin maana ke unhein doosre saahib ke saath yoon hi qabr mein rehne doon . Chunanche chhay maheene ke baad main ne un ki laash ko qabr se nikala dekha to sirf kaan thora sa galne ke siwa baaqi saara jism isi tarah tha jaise dafan kiya gaya tha .