Hum se Muhammad bin Salam Baikandi ne byaan kiya , unhein Abu Muawiya ne khabar di , unhein Abu Ishaq Shaybani ne , unhein Shabi ne , un se Ibn Abbas razi Allahu anhuma ne farmaya ke ek shakhs ki wafat ho gayi . Rasool Allah salla Allahu alaihi wasallam us ki iyadat ko jaya karte thay . Kyonke un ka intiqal raat mein hua tha is liye raat hi mein logon ne unhein dafan kar diya aur jab subah hui to Nabi Karim salla Allahu alaihi wasallam ko khabar di , Aap salla Allahu alaihi wasallam ne farmaya (ke janaza tayyar hote waqt) mujhe batane mein (kya) rukawat thi ? Logon ne kaha ke raat thi aur andhera bhi tha . Is liye hum ne munasib nahin samjha ke kahin Aap ko takleef ho . Phir Nabi Karim salla Allahu alaihi wasallam us ki qabr par tashreef laaye aur namaaz parhi .

Hum se Muhammad bin Muthanna ne byaan kiya , kaha ke hum se Ghundar ne byaan kiya , un se Shubah ne byaan kiya , unhon ne Sulayman Shaybani se suna , unhon ne Shabi se , unhon ne byaan kiya ke mujhe ek aise shakhs ne khabar di jo (ek marteba) Nabi Karim salla Allahu alaihi wasallam ke saath ek akeli alag thalag tooti hui qabr par se guzar rahe thay wahan Nabi Karim salla Allahu alaihi wasallam ne namaaz parhayi aur log Aap salla Allahu alaihi wasallam ke peeche saf bandhe huay thay . Sulayman ne kaha ke main ne Shabi se poocha ke Abu Amr Aap se yeh kis ne byaan kiya to unhon ne kaha ke Ibn Abbas razi Allahu anhuma ne .