Hum se Muhammad bin Bashar ne byaan kiya , unhon ne kaha ke hum se Ghundar ne byaan kiya , unhon ne kaha hum se Shubah ne byaan kiya , unhon ne kaha ke main ne Muhammad bin Munkadir se suna , unhon ne kaha ke main ne Jabir bin Abdullah razi Allahu anhuma se suna , unhon ne kaha ke jab mere waalid shaheed kar diye gaye to main un ke chehre par para ho kapra kholta aur rota tha . Doosre log to mujhe is se rokte thay lekin Nabi Karim salla Allahu alaihi wasallam kuch nahin keh rahe thay . Aakhir meri chachi Fatima razi Allahu anha bhi rone lagein to Nabi Karim salla Allahu alaihi wasallam ne farmaya ke tum log ro-o ya chup raho . Jab tak tum log mayyat ko uthate nahin malaika to barabar is par apne paron ka saaya kiye huay hain . Is riwayat ki mutaba'at Shubah ke saath Ibn Jurayj ne ki , unhein Ibn Munkadir ne khabar di aur unhon ne Jabir razi Allahu anhu se suna .

Hum se Ali bin Abdullah bin Madini ne byaan kiya ‘ un se Sufyan bin Uyaynah ne byaan kiya ‘ kaha ke hum se Muhammad bin Munkadir ne byaan kiya ‘ kaha ke main ne Jabir bin Abdullah Ansari razi Allahu anhuma se suna ‘ unhon ne farmaya ke mere waalid ki laash Uhud ke maidan se laayi gayi . (mushrikon ne) Aap ki surat tak bigar di thi . Naash Rasool Allah salla Allahu alaihi wasallam ke saamne rakkhi gayi . Oopar se ek kapra dhaka hua tha ‘ main ne chaha ke kapre ko hataoon . Lekin meri qaum ne mujhe roka . Phir dobara kapra hatane ki koshish ki . Is martaba bhi meri qaum ne mujh ko rok diya . Is ke baad Rasool Allah salla Allahu alaihi wasallam ke hukm se janaza uthaya gaya . Is waqt kisi zor zor se rone wale ki awaaz sunayi di to Rasool Allah salla Allahu alaihi wasallam ne poocha ke yeh kaun hai ? Logon ne kaha ke yeh Amr ki beti ya (yeh kaha ke) Amr ki behen hain . (naam mein Sufyan ko shak hua tha) Aap salla Allahu alaihi wasallam ne farmaya ke roti kyon hain ? Ya yeh farmaya ke ro-o nahin ke malaika barabar apne paron ka saaya kiye rahe hain jab tak is ka janaza uthaya gaya .

Hum se Sadaqah Bin Fazl ne bayan kiya, kaha ke humein Sufyan Bin Uyainah ne khabar di, kaha ke mein ne Muhammad Bin Munkadir se suna, unhon ne Jabir (Radi Allahu Anhu) se suna, wo bayan karte thay ke mere walid Rasul Allah (Sallallahu Alaihi Wasallam) ke samne laye gaye (Uhud ke mauqe par) aur kafiron ne un ke naak kaan kaat dale thay, un ki naash Nabi Kareem (Sallallahu Alaihi Wasallam) ke samne rakhi gayi to mein ne aage barh kar un ka chehra kholna chaha lekin meri qaum ke logon ne mujhe mana kar diya phir Nabi Kareem (Sallallahu Alaihi Wasallam) ne rone peetne ki awaz suni (to daryaft farmaya ke kis ki awaz hai?) logon ne bataya ke Amr ki larki hain (shaheed ki behen) ya Amr ki behen hain (shaheed ki chachi shaq rawi ko tha) Aap (Sallallahu Alaihi Wasallam) ne farmaya kyun ro rahi hain ya (Aap ne farmaya ke) royein nahi malaika barabar un par apne paron ka saya kiye hue hain. Imam Bukhari (Rahimahullah) kehte hain ke mein ne Sadaqah se poocha kya hadees mein ye bhi hai ke (janaza) uthaye jaane tak to unhon ne bataya ke Sufyan ne baaz auqat ye alfaz bhi hadees mein bayan kiye thay
.

Aur Abul Walid ne bayan kiya, un se Shuba ne, un se Ibn Al-Munkadir ne, unhon ne Jabir Radi Allahu Anhu se suna, unhon ne bayan kiya ke mere walid Abdullah Radi Allahu Anhu shaheed kar diye gaye to mein rone laga aur bar bar in ke chehre se kapra hatata. Sahaba mujhe rokte thay lekin Rasul Allah Sallallahu Alaihi Wasallam ne nahi roka. (Fatima Bint-e-Amr Radi Allahu Anha Abdullah ki bahen bhi rone lagin) Aap Sallallahu Alaihi Wasallam ne un se farmaya ke roo mat. (Aap Sallallahu Alaihi Wasallam ne «la tabkihi» farmaya, ya «ma tabkihi» . Ravi ko shaq ho gaya) Farishte barabar in ki lash par apne paron ka saye kiye hue thay. Yahan tak ke un ko utha liya gaya
.