Hum se Abdullah bin Yusuf Tanisi ne byaan kiya , unhon ne kaha ke humein Imam Malik rahimahullah ne khabar di , unhein Hisham bin Urwah ne , unhein un ke baap (Urwah bin Zubayr) ne aur unhein Aisha Siddiqa razi Allahu anha ne ke Rasool Allah salla Allahu alaihi wasallam raat mein terah rakatain parhte thay . Phir jab subah ki azaan sunte to do halki rakatain (sunnat Fajr) parh lete .

Hum se Abdullah bin Yusuf ne bayan kiya unhon ne kaha ke humein Imam Malik ne Aamir bin Abdullah bin Zubair se yeh khabar pehnchai , unhon ne Amr bin Sulaim Zurqi ke wastay se bayan kiya , unhon ne Abu Qatada Salmi raziyallahu anhu se ke Rasool Allah salla Allahu alaihi wa sallam ne farmaya jab tum mein se koi shakhs masjid mein dakhil ho to baithne se pehle do rakat namaz parh lay .

Hum se Abu Nauman ne byaan kiya , kaha ke hum se Hammad bin Zayd ne byaan kiya , un se Amr bin Dinar ne , un se Jabir bin Abdullah razi Allahu anhuma ne byaan kiya ke aik shakhs aaya Nabi Karim salla Allahu alaihi wasallam Juma ka khutbah de rahe thay . Aap salla Allahu alaihi wasallam ne poocha ke ay falan! kya tum ne (Tahiyatul Masjid ki) namaaz parh li . Us ne kaha ke nahi . Aap salla Allahu alaihi wasallam ne farmaya achha uth aur do rakat namaaz parh le .

Hum se Ali bin Abdullah ne byaan kiya , kaha ke hum se Sufyan bin Uyaynah ne Amr se byaan kiya , unhon ne Jabir razi Allahu anhu se suna ke aik shakhs Juma ke din Masjid mein aaya . Nabi Karim salla Allahu alaihi wasallam khutbah parh rahe thay . Aap salla Allahu alaihi wasallam ne us se poocha ke kya tum ne (Tahiyatul Masjid ki) namaaz parh li hai? Aane wale ne jawab diya ke nahi . Aap salla Allahu alaihi wasallam ne farmaya ke utho aur do rakat namaaz (Tahiyatul Masjid) parh lo .

Hum se Abu Naeem ne byaan kiya , kaha ke hum se Sayf bin Sulayman ne byaan kiya ke mein ne Mujahid se suna , unhon ne farmaya ke Abdullah bin Umar razi Allahu anhuma (Makkah Sharif mein) apne ghar aaye . Kisi ne kaha baithe kya ho Nabi Karim salla Allahu alaihi wasallam yeh aa gaye balkay Kaba ke andar bhi tashreef le ja chukay hain . Abdullah ne kaha yeh sun kar mein aaya . Dekha to Nabi Karim salla Allahu alaihi wasallam Kaba se bahar nikal chukay hain aur Bilal razi Allahu anhu darwaze par kharay hain . Main ne un se poocha ke ae Bilal! Rasool Allah salla Allahu alaihi wasallam ne Kaba mein namaaz parhi ? Unhon ne kaha ke han parhi thi . Main ne poocha ke kahan parhi thi ? Unhon ne bataya ke yahan in do sutoonon ke darmiyan . Phir Aap bahar tashreef laaye aur do rakatain Kaba ke darwaze ke saamne parhein aur Abu Hurairah razi Allahu anhu ne kaha ke mujhe Nabi Karim salla Allahu alaihi wasallam ne chasht ki do rakaton ki wasiyat ki thi aur Utban ne farmaya ke Rasool Allah salla Allahu alaihi wasallam aur Abu Bakr aur Umar razi Allahu anhuma subah din charhay mere ghar tashreef laaye . Hum ne Aap salla Allahu alaihi wasallam ke peeche saff bana li aur Nabi Karim salla Allahu alaihi wasallam ne do rakat namaaz parhayi .

Hum se Sulaiman Bin Harb ne bayan kiya, unhon ne kaha hum se Shuba ne bayan kiya, un se Muharib Bin Dithar ne bayan kiya, unhon ne kaha ke mein ne Jabir Bin Abdullah Ansari (Radi Allahu Anhuma) se suna, unhon ne bayan kiya ke mein Nabi Kareem (Sallallahu Alaihi Wasallam) ke sath ek safar mein tha. Jab hum Madinah pahunche to Aap (Sallallahu Alaihi Wasallam) ne farmaya ke pehle masjid mein ja aur do rakat (nafal) namaz parh
.

Hum se Abu Asim ne bayan kiya, unhon ne kaha hum se Ibn Juraij ne bayan kiya, un se Ibn Shihab ne, un se Abdur Rahman Bin Abdullah Bin Kaab ne, un se un ke walid (Abdullah) aur chacha Ubaidullah Bin Kaab (Radi Allahu Anhu) ne bayan kiya ke Nabi Kareem (Sallallahu Alaihi Wasallam) jab din chadhe safar se wapas hote to baithne se pehle masjid mein ja kar do rakat nafal namaz parhte thay
.

Hum se Abul Yaman ne bayan kiya , unhon ne kaha ke humein Shoaib ne khabar di , unhon ne Zuhri se , unhon ne kaha ke mujhe Urwah bin Zubair ne khabar di ke Umm ul Momineen Aisha raziyallahu anha ne farmaya ke jab moazzin subah ki doosri azan de kar chup hota to Rasool Allah salla Allahu alaihi wa sallam khare hote aur farz se pehle do rakat sunnat fajr halki phulki ada karte subah sadiq roshan ho jane ke baad phir dahni karwat par let rahte . Yahan tak ke moazzin takbeer kehne ki ittila dene ke liye aap salla Allahu alaihi wa sallam ke pas aata .