Hum se Abdullah bin Yusuf Tinnisi ne byaan kiya , unhon ne kaha ke hamen Imam Malik rahimahullah ne khabar di , unhen Hisham bin Urwah ne , unhen un ke baap Urwah bin Zubair ne aur unhen Ummul Mumineen Ayesha Siddiqa razi Allahu anha ne ke aap ne Rasool Allah salla Allahu alaihi wasallam ko kabhi baith kar namaaz parhte nahi dekha albatta jab aap za'eef ho gaye to qiraat Quran namaaz mein baith kar karte thay , phir jab ruku ka waqt aata to kharay ho jate aur phir taqreeban tees ya chalees aayaten parh kar ruku karte .

Hum se Abdullah bin Yusuf Tinnisi ne byaan kiya , unhon ne kaha ke hamen Imam Malik rahimahullah ne Abdullah bin Yazid aur Umar bin Ubaidullah ke ghulam Abun Nadr se khabar di , unhen Abu Salamah bin Abdur Rahman bin Auf ne , unhen Ummul Mumineen Ayesha Siddiqa razi Allahu anha ne ke Rasool Allah salla Allahu alaihi wasallam Tahajjud ki namaaz baith kar parhna chahte to qiraat baith kar karte . Jab taqreeban tees chalees aayaten parhni baaqi reh jatin to Aap salla Allahu alaihi wasallam unhen kharay ho kar parhte . Phir ruku aur sajdah karte phir doosri rakat mein bhi isi tarah karte . Namaaz se farigh hone par dekhte ke main jaag rahi hoon to mujh se baaten karte lekin agar main soti hoti to Aap salla Allahu alaihi wasallam bhi lait jate .

Hum se Muhammad bin Muthanna ne byaan kiya , unhon ne kaha ke hum se Yahya bin Saeed Qattan ne byaan kiya aur unhon ne kaha ke hum se Hisham bin Urwah ne byaan kiya ke mujhe mere baap Urwah ne khabar di ke Aisha Siddiqa razi Allahu anha ne batlaya ke mein ne Nabi Karim salla Allahu alaihi wasallam ko raat ki kisi namaaz mein baith kar Quran parhte nahin dekha . Yahan tak ke Aap salla Allahu alaihi wasallam boorhay ho gaye to baith kar Quran parhte thay lekin jab tees chaalis aayatein reh jaatin to kharay ho jaate phir is ko parh kar ruku karte thay .

Hum se Bishr bin Hakam ne byaan kiya , unhon ne kaha ke hum se Sufyan ne byaan kiya , unhon ne kaha ke mujh se Salim Abun Nadar ne Abu Salamah bin Abdur Rahman se byaan kiya aur un se Aisha razi Allahu anha ne ke Nabi Karim salla Allahu alaihi wasallam jab Fajr ki sunnatain parh chukte to agar mein jaagti hoti to Aap salla Allahu alaihi wasallam mujh se baatein karte warna lait jaate jab tak namaaz ki azaan hoti .

Hum se Ali bin Abdullah Madini ne byaan kiya , un se Sufyan bin Uyaynah ne byaan kiya , un se Abun Nadar Salim ne byaan kiya ke mujh se mere baap Abu Umayyah ne byaan kiya , un se Abu Salamah ne aur un se Aisha razi Allahu anha ne ke Nabi Karim salla Allahu alaihi wasallam jab do rakat (Fajr ki sunnat) parh chukte to is waqt agar mein jaagti hoti to Aap salla Allahu alaihi wasallam mujh se baatein karte warna lait jaate . Main ne Sufyan se kaha ke baaz raavi Fajr ki do rakatain ise batate hain to unhon ne farmaya ke han yeh wahi hain .

Hum se Hasan bin Abdul Aziz ne byaan kiya , kaha hum se Abdullah bin Yahya ne byaan kiya , unhein Haywah ne khabar di , unhein Abu al-Aswad ne , unhon ne Urwah se suna aur unhon ne Aisha razi Allahu anha se ke Nabi Karim salla Allahu alaihi wasallam raat ki namaz mein itna taveel qiyam karte ke Aap ke qadam phat jate . Aisha razi Allahu anha ne ek martaba arz kiya ke ya Rasool Allah! Aap itni zyada mushaqqat kyun uthate hain . Allah Ta'ala ne to Aap ki agli pichhli khatayein maaf kar di hain . Aap salla Allahu alaihi wasallam ne farmaya kya phir main shukr-guzar banda banna pasand na karoon . Umr ke aakhri hisse mein (jab taveel qiyam dushwar ho gaya to) Aap salla Allahu alaihi wasallam baith kar raat ki namaz parhte aur jab ruku ka waqt aata to kharay ho jayein ge (aur taqreeban tees ya chalis aayatein aur parhte) phir ruku karte .