Hum se Abu Muammar ne byaan kiya , kaha ke hum se Abdul Waris ne byaan kiya , kaha ke hum se Hussain Mu'allim ne byaan kiya aur un se Abdullah bin Buraidah ne ke Imran bin Hussain ne jinhen bawaseer ka marz tha . Aur kabhi Abu Muammar ne yun kaha ke Imran bin Hussain razi Allahu anhuma se riwayat hai ke main ne Nabi Karim salla Allahu alaihi wasallam se baith kar namaaz parhne ke baare mein poocha to Aap salla Allahu alaihi wasallam ne farmaya ke kharay ho kar namaaz parhna afzal hai lekin agar koi baith kar namaaz parhe to kharay ho kar parhne wale se use aadha sawab mile ga aur lait kar parhne wale ko baith kar parhne wale se aadha sawab mile ga . Abu Abdullah (Imam Bukhari rahimahullah) farmate hain ke hadees ke alfaaz mein «naa'im» «muztaji» ke maani mein hai yani lait kar namaaz parhne wala .

Hum se Ishaq bin Mansoor ne byaan kiya , unhon ne kaha hamen Rooh bin Ubadah ne khabar di , unhon ne kaha hamen Hussain ne khabar di , unhen Abdullah bin Buraidah ne , unhen Imran bin Hussain razi Allahu anhuma ne ke aap ne Nabi Karim salla Allahu alaihi wasallam se poocha (doosri sanad) aur hamen Ishaq bin Mansoor ne khabar di , kaha ke hamen Abdus Samad ne khabar di , kaha ke main ne apne baap Abdul Waris se suna , kaha ke hum se Hussain ne byaan kiya aur un se Ibn Buraidah ne kaha ke mujh se Imran bin Hussain razi Allahu anhuma ne byaan kiya , woh bawaseer ke mareez thay unhon ne kaha ke main ne Rasool Allah salla Allahu alaihi wasallam se kisi aadmi ke baith kar namaaz parhne ke baare mein poocha ke Aap salla Allahu alaihi wasallam ne farmaya ke afzal yahi hai ke kharay ho kar parhe kyunki baith kar parhne wale ko kharay ho kar parhne wale se aadha sawab milta hai aur laitay laitay parhne wale ko baith kar parhne wale se aadha sawab milta hai .