Hum se Adam ne bayan kiya, un se Sho’bah ne, un se Ibn-ul-Asbahaani ne, unhon ne Abu Saleh Zakwan se suna, woh Abu Sa’eed Khudri Radhiallahu Anhu se riwayat karte hain ke aurton ne Rasoolullah Sallallahu Alaihi Wasallam se kaha ke (Aap Sallallahu Alaihi Wasallam se faida uthaane mein) mard hum se aage badh gaye hain, is liye Aap apni taraf se hamaare (waaz ke) liye (bhi) koi din khaas farmaa den. To Aap Sallallahu Alaihi Wasallam ne un se ek din ka wa’da farmaa liya. Us din aurton se Aap ne mulaqaat ki aur unhein waaz farmaaya aur (munasib) ahkaam sunaaye jo kuch Aap Sallallahu Alaihi Wasallam ne un se farmaaya tha us main yeh baat bhi thi ke jo koi aurat tum main se (apne) teen (ladke) aage bhej degi to woh us ke liye dozakh se panaah ban jaayenge. Us par ek aurat ne kaha, agar do (bachche bhej de) Aap Sallallahu Alaihi Wasallam ne farmaaya haan! Aur do (ka bhi yeh hukm hai).

Hum se Muslim bin Ibrahim ne byaan kiya , kaha ke hum se Shubah ne , un se Abdur Rahman bin Abdullah Isbahani ne , un se Zakwan ne aur un se Abu Saeed Khudri razi Allahu anhu ne ke auraton ne Nabi Karim salla Allahu alaihi wasallam se darkhwast ki ke humein bhi nasihat karne ke liye Aap ek din khaas farma dijiye . Nabi Karim salla Allahu alaihi wasallam ne (un ki darkhwast manzoor farmate huay ek khaas din mein) un ko waaz farmaya aur batlaya ke jis aurat ke teen bache mar jayein to woh is ke liye Jahannam se panah ban jaate hain . Is par ek aurat ne poocha: ya Rasool Allah! agar kisi ke do hi bache marein ? Aap salla Allahu alaihi wasallam ne farmaya ke do bachon par bhi .

Hum se Musaddad ne bayan kiya, kaha hum se Abu Awanah ne bayan kiya, in se Abd-ul-Rahman bin al-Asbahani ne, in se Abu Salih Zhakwan ne aur in se Abu Saeed razi Allahu anhune ke ek khatoon Nabi Karim salla Allahu alaihi wasallam ki khidmat mein hazir huaien aur kaha: ya Rasool Allah! Aap ki tamam ahadees mard le gaye, hamare liye bhi Aap koi din apni taraf se makhsus kar dein jis mein hum Aap ke paas aayein aur Aap hamain woh taleemaat dein jo Allahne Aap ko sikhayi hain. Nabi Karim salla Allahu alaihi wasallam ne farmaya ke falan falan din falan falan jagah jama ho jao. Chunanche auratein jama huaien aur Nabi Karim salla Allahu alaihi wasallam in ke paas aane aur unhein is ki taleem di jo Allahne Aap salla Allahu alaihi wasallam ko sikhaya thu. Phir Aap salla Allahu alaihi wasallam ne farmaya ”tum mein jo aurat bhi apni zindagi mein apne teen bache aage bheij de gi. (yani in ki wafat ho jaye gi) to woh is ke liye dozakh se rukawat ban jayein ge. Is par in mein se ek khatoon ne kaha: ya Rasool Allah! do? Unhon ne is kalma ko do martaba doharaya, phir Nabi Karim salla Allahu alaihi wasallam ne farmaya ”haan do, do, do bhi yahi darja rakhte hain.“