Hum se Ismail bin Abi Owais ne bayan kiya, un se Malik ne Hishaam bin ’Urwah se, unhon ne apne baap se naql kiya, unhon ne Abdullah bin ’Amr bin Al-’Aas Radhiallahu Anhuma se naql kiya ke main ne Rasoolullah Sallallahu Alaihi Wasallam se suna Aap Sallallahu Alaihi Wasallam farmaate the ke Allah ilm ko is tarah nahi utha lega ke us ko bandon se cheen le. Balke woh (pukhtakaar) ulama ko maut de kar ilm ko uthaayega. Hatta ke jab koi aalim baaqi nahi rahega to log jaahilon ko sardaar bana lenge, un se sawaalaat kiye jaayenge aur woh baghair ilm ke jawaab denge. Is liye khud bhi gumraah honge aur logon ko bhi gumraah karenge. Firabri ne kaha hum se Abbas ne bayan kiya, kaha hum se Qutaibah ne, kaha hum se Jareer ne, unhon ne Hishaam se maanind is Hadees ke.

Hum se Saeed bin Tulayd ne bayan kiya, kaha mujh se Abdullah bin Wahb ne, kaha mujh se Abd-ul-Rahman bin Shuraih aur in ke alawa Ibn Laya ne bayan kiya, in se Abu al-Aswad ne aur in se Urwah ne bayan kiya ke Abdullah bin Amr bin al-Aas razi Allahu anhu ne hamain le kar Hajj kiya to main ne unhein yeh kehte suna ke main ne Nabi Karim salla Allahu alaihi wasallam se suna, Aap salla Allahu alaihi wasallam ne farmaya ke Allah Ta'ala ilm ko, is ke baad ke tumhein diya hai ek dam se nahi utha le ga balkay usay is tarah khatm kare ga ke ulama ko in ke ilm ke saath utha le ga phir kuch jahil log baqi reh jayein ge, in se fatwa poochha jaye ga aur woh fatwa apni rai ke mutabiq dein ge. Pas woh logon ko gumrah karein ge aur woh khud bhi gumrah hon ge. Phir main ne yeh hadees Nabi Karim salla Allahu alaihi wasallam ki zauja mutahhara Aisha razi Allahu anha se bayan kiya. In ke baad Abdullah bin Umar razi Allahu anhuma ne dobara Hajj kiya to Umm al-Momineen ne mujh se kaha ke bhateejay Abdullah ke paas jao aur meere liye is hadees ko sun kar khoob mazboot kar lo jo hadees tum ne mujh se in ke wasta se bayan ki thi. Chunanche main in ke paas aaya aur main ne in se poochha to unhon ne mujh se woh hadees bayan ki, isi tarah jaisa ke woh pehle mujh se bayan kar chuke thay, phir main Aisha razi Allahu anha ke paas aaya aur unhein is ki khabar di to unhein taj-jub hua aur bolein ke wallah Abdullah bin Amr ne khoob yaad rakkha.