Aur auraten bhi aisa hi karein aur woh log bhi jo gharon aur dehaton waghaira mein hon aur jamaat mein na aa sakein (woh bhi aisa hi karein) kyunke Nabi Karim salla Allahu alaihi wasallam ka farmaan hai ke Islam walo! yeh hamari Eid hai . Anas bin Malik razi Allahu anhu ke ghulam Ibn Abi Utbah Zawiya nami gaon mein rehte thay . Unhein Aap ne hukm diya tha ke woh apne ghar walon aur bachon ko jama kar ke shehar walon ki tarah namaaz-e-Eid parhein aur takbeer kahein . Ikrima ne shehar ke qurb o jawar mein aabaad logon ke liye farmaya ke jis tarah Imam karta hai yeh log bhi Eid ke din jama ho kar do rakat namaaz parhein . Ata ne kaha ke agar kisi ki Eid ki namaaz (jamaat) chhoot jaye to do rakat (tanha) parh le .

Hum se Yahya bin Bukayr ne byaan kiya , kaha ke in se Layth bin Saad ne byaan kiya , in se Aqeel ne , in se Ibn Shihab ne , in se Urwah ne , in se Aisha razi Allahu anha ne kaha Abu Bakr razi Allahu anhu in ke yahan (Mina ke dinon mein) tashreef laaye is waqt ghar mein do larki'an daf baja rahi theen aur Bu'as ki larayi ki nazmein ga rahi theen . Nabi Karim salla Allahu alaihi wasallam chehra mubarak par kapra daale hue tashreef farma thay . Abu Bakr razi Allahu anhu ne in dono ko danta . Is par Aap salla Allahu alaihi wasallam ne chehra mubarak se kapra hata kar farmaya ke Abu Bakr jaane bhi do yeh Eid ke din hain (aur woh bhi Mina mein) .