Hum se Saeed bin Abi Maryam ne byaan kiya , unhon ne kaha ke hum se Muhammad bin Jafar ne byaan kiya , unhon ne kaha ke mujhe Zayd bin Aslam ne khabar di , unhein Iyaz bin Abdullah bin Abi Sarh ne , unhein Abu Saeed Khudri razi Allahu anhu ne , Aap ne kaha ke Nabi Karim salla Allahu alaihi wasallam Eid ul-Fitr aur Eid al-Adha ke din (Madinah ke bahar) Eidgah tashreef le jate to sab se pehle Aap salla Allahu alaihi wasallam namaaz parhate , namaaz se farigh ho kar Aap salla Allahu alaihi wasallam logon ke saamne kharay hote . Tamam log apni safon mein baithe rehte , Aap salla Allahu alaihi wasallam unhein waaz o nasihat farmate , achhi baaton ka hukm dete . Agar Jihad ke liye kahein lashkar bhejne ka iradah hota to us ko alag karte . Kisi aur baat ka hukm dena hota to woh hukm dete . Is ke baad shehar ko wapas tashreef laate . Abu Saeed Khudri razi Allahu anhu ne byaan kiya ke log barabar isi Sunnat par qaim rahe lekin Muawiyah ke zamana mein Marwan jo Madinah ka haakim tha phir mein us ke sath Eid ul-Fitr ya Eid al-Adha ki namaaz ke liye nikla hum jab Eidgah pahunche to wahan mein ne Kaseer bin Salt ka bana hua aik minbar dekha . Jaate hi Marwan ne chaha ke is par namaaz se pehle (khutbah dene ke liye) charhe is liye mein ne un ka daaman pakar kar khaincha aur lekin woh jhatak kar oopar charh gaya aur namaaz se pehle khutbah diya . Mein ne us se kaha ke wallah tum ne (Nabi Karim salla Allahu alaihi wasallam ki Sunnat ko) badal diya . Marwan ne kaha ke ay Abu Saeed! ab woh zamana guzar gaya jis ko tum jaante ho . Abu Saeed ne kaha ke bakhuda mein jis zamana ko jaanta hoon us zamana se behtar hai jo mein nahi jaanta . Marwan ne kaha ke hamare daur mein log namaaz ke baad nahi baithte , is liye mein ne namaaz se pehle khutbah ko kar diya .