Hum se Musaddad bin Musarhad ne byaan kiya , kaha ke hum se Yahya bin Saeed Qattan ne Ubaydullah Umari se byaan kiya , unhon ne kaha ke mujh se Saeed bin Abi Saeed Maqabri ne apne walid se byaan kiya , unhon ne Abu Hurayrah razi Allahu anhu se ke Nabi Karim salla Allahu alaihi wasallam masjid mein tashreef le gaye . Itne mein ek shakhs aaya aur namaaz parhne laga . Namaaz ke baad us ne aa kar Nabi Karim salla Allahu alaihi wasallam ko salam kiya , Aap ne salam ka jawab de kar farmaya ke wapas ja kar dobara namaaz parh , kyunke tune namaaz nahi parhi . Chunanchay us ne dobara namaaz parhi aur wapas aa kar phir Aap salla Allahu alaihi wasallam ko salam kiya , Aap ne is marteba bhi yahi farmaya ke dobara ja kar namaaz parh , kyunke tune namaaz nahi parhi . Teen baar isi tarah hua . Aakhir us shakhs ne kaha ke us Zaat ki qasam! jis ne Aap ko maboos kiya . Main to is se achhi namaaz nahi parh sakta . Is liye Aap mujhe sikhlaiye . Aap ne farmaya jab tu namaaz ke liye khara ho to (pehle) takbeer keh phir Quran Majeed se jo kuch tujh se ho sake parh , us ke baad ruku kar aur poori tarah ruku mein chala ja . Phir sar utha aur poori tarah khara ho ja . Phir jab tu sajda kare to poori tarah sajde mein chala ja . Phir (sajde se) sar utha kar achhi tarah baith ja . Dobara bhi isi tarah sajda kar . Yahi tareeqa namaaz ke tamam (rakaton mein) ikhtiyar kar .

Hum se Hafs bin Umar ne byaan kiya , unhon ne kaha ke hum se Shubah ne byaan kiya , unhon ne kaha Mansoor bin Mutamir ne byaan kiya , unhon ne Abud Duha Muslim bin Subayh se , unhon ne Masrooq se , unhon ne Aishah razi Allahu anha se , unhon ne farmaya ke Nabi Karim salla Allahu alaihi wasallam ruku aur sajde mein «Subhanaka Allahumma rabbana wa bihamdika , Allahumma ighfir lee» parhaya karte thay .