Mujh se Ismail bin Abi Oways ne bayan kiya, kaha mujh se Abdullah bin Wahb ne bayan kiya, in se Yunus bin Yazid Aili ne, in se Ibn Shihab ne, in se Ubaidullah bin Abdullah bin Utbah ne, in se Abdullah bin Abbas razi Allahu anhuma ne bayan kiya ke Uyaynah bin Hudhaifa bin Badr Madinah aaye aur apne bhateejay al-Hurr bin Qays bin Hisn ke yahan qiyam kiya. Al-Hurr bin Qays in logon mein se thay jinhein Umar razi Allahu anhu apne qareeb rakhte thay. Quran Majeed ke ulama Umar razi Allahu anhu ke shareek e majlis wa mashwara rehte thay, khwah woh burhay hon ya jawan. Phir Uyaynah ne apne bhateejay Hurr se kaha: bhateejay! kya Ameer-ul-Momineen ke yahan kuch rasookh haasil hai ke tum mere liye in ke yahan haziri ki ijazat le do? Unhon ne kaha ke main Aap ke liye ijazat maangoon ga. Ibn Abbas razi Allahu anhuma ne bayan kiya ke phir unhon ne Uyaynah ke liye ijazat chahi (aur Aap ne ijazat di) phir jab Uyaynah majlis mein pahunche to kaha ke Ae Ibn al-Khattab, wallah! tum hamain bahut zyada nahi dete aur na hamare darmiyan insaf ke saath faisla karte ho. Is par Umar razi Allahu anhu ghussa ho gaye, yahan tak ke Aap ne unhein saza dene ka irada kar liya. Itne mein al-Hurr ne kaha: Ameer-ul-Momineen! Allah Ta'ala ne apne Nabi salla Allahu alaihi wasallam se farmaya «khuzhil-afwa wa'-mur bil-urfi wa a-ridh an-il-jaahileena» ke ”maaf karne ka tariqa ikhtiyar karo aur bhalayi ka hukm do aur jahilon se iraz karo.“ Aur yeh shakhs jahilon mein se hai. Pas wallah! Umar razi Allahu anhu ke samne jab yeh aayat unhon ne tilawat ki to Aap thande ho gaye aur Umar razi Allahu anhu ki aadat thi ke Allah ki kitab par furan amal karte.