Aur Allah Ta'ala ka (Surah al-Furqan mein) farmana «Waj'alna lil-muttaqeena imaman» ke ”Ae Parwardigar! hum ko parhezgaron ka peshwa bana de.“ Mujahid ne kaha yaani imam bana de ke hum log agle logon sahabah aur tabiyeen ki pairwi karein aur hamare baad jo log aayein wo hamari pairwi karein aur Abdullah bin Aun ne kaha teen baatein aisi hain jin ko mein khaas apne liye aur doosre musalman bhaiyon ke liye pasand karta hoon, ek to ilm-e-hadees, musalmanon ko ise zaroor hasil karna chahiye. Doosre Quran Majeed, ise samajh kar parhein aur logon se Quran ke matalib ki tahqeeq karte rahein. Teesre yeh ke musalmanon ka zikr hamesha khair o bhalayi ke saath kiya karein, kisi ki burayi ka zikr na karein.

`Hum se Amr bin Abbas ne bayan kiya, kaha hum se Abdur Rahman bin Mahdi ne, kaha hum se Sufyan Sauri ne, un se Wasil ne, un se Abu Wa'il ne bayan kiya ke is masjid (Khana-e-Ka'ba) mein, mein Shaiba bin Usman Hujabi (jo Ka'ba ke kaleed-bardar thay) ke paas baitha to unhon ne kaha ke jahan tum baithe ho, wahin Umar Radi Allahu Anhu bhi mere paas baithe thay aur unhon ne kaha tha ke mera irada hai ke Ka'ba mein kisi tarah ka sona chandi na chhodoon aur sab musalmanon mein taqseem kar doon jo nazr-e-Allah Ka'ba mein jama hai. Mein ne kaha ke aap aisa nahi kar sakte. Kaha kyun? Mein ne kaha ke aap ke donon sathiyon (Rasul Allah صلی اللہ علیہ وسلم aur Abu Bakr Radi Allahu Anhu) ne aisa nahi kiya tha. Is par unhon ne kaha ke wo donon buzurg aise hi thay jin ki iqtida karni hi chahiye.