Hum se Yahya bin Sulayman ne byaan kiya , kaha ke mujh se Abdullah bin Wahb ne byaan kiya , kaha ke mujh se Yunus bin Yazid Aili ne Ibn Shihab se byaan kiya , unhon ne Hamzah bin Abdullah se , unhon ne apne baap Abdullah bin Umar razi Allahu anhuma se khabar di ke jab Rasool Allah salla Allahu alaihi wasallam ki bimari shiddat ikhtiyar kar gayi aur Aap salla Allahu alaihi wasallam se namaaz ke liye kaha gaya to Aap salla Allahu alaihi wasallam ne farmaya ke Abu Bakr se kaho ke woh namaaz parhayen . Aishah razi Allahu anha ne arz kiya ke Abu Bakr kache dil ke aadmi hain . Jab woh Quran Majeed parhte hain to bohot rone lagte hain . Lekin Aap salla Allahu alaihi wasallam ne farmaya ke un hi se kaho ke namaaz parhayen . Dobara unhon ne phir wohi uzr dohraya . Aap salla Allahu alaihi wasallam ne phir farmaya ke un se namaaz parhane ke liye kaho . Tum to bilkul Sawahib Yusuf ki tarah ho . Is hadees ki mutabaat Muhammad bin Waleed Zubaydi aur Zuhri ke bhanje aur Ishaaq bin Yahya Kalbi ne Zuhri se ki hai aur Aqeel aur Mamar ne Zuhri se , unhon ne Hamzah bin Abdullah bin Umar se , unhon ne Nabi Karim salla Allahu alaihi wasallam se .