Hum se Munzhir bin al-Waleed al-Jaroodi ne bayan kiya , kaha hum se Abu Qutaibah , Salm Shuayri ne bayan kiya , kaha hum se Imam Malik ne , in se Nafi ne bayan kiya ke Ibn Umar razi Allahu anhuma Ramzan ka fitrana Nabi Karim salla Allahu alaihi wasallam hi ke pehle Mudd ke wazan se dete thay aur qasam ka kaf-fara bhi Nabi Karim salla Allahu alaihi wasallam ke Mudd se hi dete thay . Abu Qutaibah ne isi sanad se bayan kiya ke hum se Imam Malik ne bayan kiya ke hamara Mudd tumhare Mudd se bada hai aur hamare nazdeek tarjeeh sirf Nabi Karim salla Allahu alaihi wasallam hi ke Mudd ko hai . Aur mujh se Imam Malik ne bayan kiya ke agar aisa koi hakim aaya jo Nabi Karim salla Allahu alaihi wasallam ke Mudd se chhota Mudd muqarrar kar de to tum kis hisab se (sadqa e fitr waghaira) nikaalo ge ? Main ne arz kiya ke aaisi surat mein hum Nabi Karim salla Allahu alaihi wasallam hi ke Mudd ke hisab se fitra nikala karein ge ? Unhon ne kaha ke kya tum dekhte nahi ke muamla hamesha Nabi Karim salla Allahu alaihi wasallam hi ke Mudd ki taraf laut-ta hai .