Aur Allah ne (Surah al-Nahl mein) farmaya «wa laa tat-takhizhooo aimaanikum dakhalum-bainakum fa-tazil-la qadamum-ba-da subootihaa wa tazhoo-quus-sooo-a bimaa sadat-tum an sabilillaahi wa lakum azhaabun azheemun» ke ”apni qasmon ko aapas mein fasad ki buniyaad na banao is liye ke Islam par logon ka qadam jame aur phir ukharr jaye aur Allah ki raah se rokne ke badle tum ko dozakh ka azab chakhna pare , tum ko sakht saza di jaye“ . Is aayat mein jo «dakhalan» ka lafz hai is ke maani dagha aur fareib ke hain . «ghamsa» ke maani dobo dena .

Hum se Muhammad bin Muqatil ne bayan kiya , unhon ne kaha hum ko Nadr ne khabar di , kaha hum ko Shubah ne khabar di , kaha hum se Firas ne bayan kiya , kaha ke main ne Shabi se suna , unhon ne Abdullah bin Amr se ke Nabi Karim salla Allahu alaihi wasallam ne farmaya ”kabeera gunah Allah ke saath shirk karna , walidain ki nafarmani karna , kisi ki nahaq jaan lena aur «yameen-ul-ghamoosu» qasdan jhooti qasam khane ko kehte hain .“