Namaaz ka jo hissa (jamaat ke saath) pa sako usay parh lo aur jo na pa sako usay baad mein poora kar lo . Yeh masla Abu Qatadah razi Allahu anhu ne Nabi Karim salla Allahu alaihi wa sallam se riwayat kiya hai .

Hum se Aadam bin Abi Iyaas ne byaan kiya , kaha ke hum se Muhammad bin Abdur Rahman bin Abi Zib ne byaan kiya , kaha ke hum se Imam Zuhri ne Saeed bin Musayyab se byaan kiya , unhon ne Abu Hurayrah razi Allahu anhu se , unhon ne Nabi Karim salla Allahu alaihi wa sallam se (doosri sanad) aur Zuhri ne Abu Salama se , unhon ne Abu Hurayrah razi Allahu anhu se , unhon ne Nabi Karim salla Allahu alaihi wa sallam se Aap salla Allahu alayhi wasallam ne farmaya tum log takbeer ki awaaz sun lo to namaaz ke liye (mamooli chaal se) chal paro . Sukoon aur waqar ko (beharhaal) pakre rakho aur daur ke mat aao . Phir namaaz ka jo hissa mile usay parh lo , aur jo na mil sake usay baad mein poora kar lo .