Hum se Ishaq bin Rahwayh ne bayan kiya, kaha hum ko Bishr bin Shuayb ne khabar di, kaha mujh se mere walid ne bayan kiya, in se Zuhri ne, kaha mujhko Abdullah bin Kabb ne khabar di aur un ko Abdullah bin Abbas razi Allahu anhuma ne khabar di ke Ali bin Abi Talib razi Allahu anhu (Marz-ul-Maut mein) Nabi Karim salla Allahu alaihi wasallam ke paas se nikle (doosri sanad) Imam Bukhari rahmahullah ne kaha aur hamase Ahmad bin Salih ne bayan kiya, kaha hum se Anbasa bin Khalid ne bayan kiya, kaha hum se Yunus bin Yazid ne bayan kiya, in se Ibn Shihab Zuhri ne bayan kiya, kaha mujhko Abdullah bin Kabb bin Malik ne khabar di aur unhein Abdullah bin Abbas razi Allahu anhuma ne khabar di ke Ali bin Abi Talib razi Allahu anhu Nabi Karim salla Allahu alaihi wasallam ke yahan se nikle, yeh is marz ka waqia hai jis mein Nabi Karim salla Allahu alaihi wasallam ki wafat hui thi. Logon ne poochha: Ae Abu al-Hasan! Nabi Karim salla Allahu alaihi wasallam ne subah kaisi guzari? Unhon ne kaha ke bi-hamdillaah Aap ko sukoon raha hai. Phir Ali razi Allahu anhu ka hath Abbas razi Allahu anhu ne pakar kar kaha. kiya tum Nabi Karim salla Allahu alaihi wasallam ko dekhte nahi ho. (wallah) teen din ke baad tumhein laathi ka banda ban-na pare ga. Wallah main samajhta hoon ke is marz mein Aap wafat pa jayein ge. Main Bani Abd-ul-Mutalib ke chehron par maut ke aasaar ko khoob pehchanta hoon, is liye hamare saath tum Nabi Karim salla Allahu alaihi wasallam ke paas chalo. Taake poochha jaye ke Nabi Karim salla Allahu alaihi wasallam ke baad khilafat kis ke hath mein rahe gi agar woh hamain logon ko milti hai to hamain maloom ho jaye ga aur agar doosron ke paas jaye gi to hum arz karein ge taake Nabi Karim salla Allahu alaihi wasallam hamare baare mein kuch wasiyat karein. Ali razi Allahu anhu ne kaha ke wallah! Agar hum ne Nabi Karim salla Allahu alaihi wasallam se khilafat ki darkhast ki aur Nabi Karim salla Allahu alaihi wasallam ne inkar kar diya to phir log hamain kabhi nahi dein ge main to Nabi Karim salla Allahu alaihi wasallam se kabhi nahi poochon ga ke Aap ke baad kaun khaleefa ho.