Aasim ibn Kulayb ne bayan kiya ke in se Abu Burdah ne bayan kiya ke main ne Ali razi Allahu anhu se poochha «qasi-yu» kya cheez hai? Batlaya ke yeh kapra tha jo hamare yahan (Hijaz mein) Sham ya Misr se aata tha is par chouri reshmi dhariyaan pari hoti thien aur is par turanj jaise naqsh o nigaar bane huay thay aur «maysarah» zain-posh woh kapra kehlata tha jise auratein resham se apne shoharوں ke liye banati thien. Yeh jhalar-dar chadar ki tarah hoti thi woh usay zard rang se rang deti thien jaise oarhne ke roomal hote hain aur Jareer ne bayan kiya ke in se Zayd ne bayan kiya ke «qasiyyah» woh chokhane kapre hote thay jo Misr se mangwaye jaate thay aur is mein resham mila hua hota tha aur «maysarah» darindon ke chamre ke zain-posh. Abu Abdullah Imam Bukhari rahmahullah ne kaha ke «maysarah» ki tafseer mein Aasim ki riwayat kasrat e turuq aur sehat ke aitbar se barhi hui hai.

Hum se Muhammad bin Muqatil ne bayan kiya, kaha hum ko Abdullah ne khabar di, kaha hum ko Sufyan ne khabar di, unhein Ash-as bin Abi Shas-sa ne, in se Muawiyah bin Suwayd bin Muqarrin ne bayan kiya aur in se Ibn Azib razi Allahu anhu ne bayan kiya ke Nabi Karim salla Allahu alaihi wasallam ne hamain surkh «maysarah» aur «qasi-yu» ke pehnne se mana farmaya hai.