Hum se Abdur Rahman bin Shaybah ne bayan kiya , kaha ke mujhe Ibn Abi al-Fudaik ne khabar di , unhein Ibn Abi Zib ne , unhein Maqburi ne aur in se Abu Hurairah razi Allahu anhu ne bayan kiya ke main pait bharne ke baad har waqt Nabi Karim salla Allahu alaihi wasallam ke saath hi raha karta tha . Is waqt main roti nahi khata tha . Na resham pehenta tha , na falan aur fulaani meri khidmat karte thay (bhook ki shiddat ki wajah se baaz auqat) main apne pait par kankriyaan laga leta aur kabhi main kisi se koi aayat parhne ke liye kehta haalan ke woh mujhe yaad hoti . Maqsad sirf yeh hota ke woh mujhe apne saath le jaye aur khana khila de aur miskeenon ke liye sab se behtareen shakhs Jafar bin Abi Talib razi Allahu anhu thay , hamain apne ghar saath le jaate aur jo kuch bhi ghar mein hota khila dete thay . Kabhi to aisa hota ke ghee ka dabba nikal kar laate aur is mein kuch na hota . Hum usay phaar kar is mein jo kuch laga hota chaat lete thay .