`Mujh se Ishaq bin Mansoor ne bayan kiya, kaha hum ko Rauh bin Ubada ne khabar di, kaha hum se Shibl bin Abbad ne, un se Ibn Abi Najeeh ne aur un se Mujahid ne ayat-e-karima «Wallazeena yutawaffauna minkum wa yazaroona azwajan» ilkh, yaani ”Aur jo log tum mein se wafat pa jayein aur biwiyan chhor jayein.“ ke mutalliq kaha ke yeh iddat jo shohar ke ghar walon ke paas guzari jati thi, pehle wajib thi, is liye Allah Ta'ala ne yeh ayat utari «Wallazeena yutawaffauna minkum wa yazaroona azwajan wasiyyatal li'azwajihim mata'an ilal hauli ghaira ikhrajin fa'in kharajna fala junaha alaikum feema fa'alna fee anfusihinna mim ma'roofin» ilkh, yaani ”Aur jo log tum mein se wafat pa jayein aur biwiyan chhor jayein (un par lazim hai ke) apni biwiyon ke haq mein nafa uthane ki wasiyyat kar jayein ke wo ek saal tak (ghar se) na nikali jayein lekin agar wo (khud) nikal jayein to koi gunah tum par nahi.“ Is baab mein jise wo (biwiyan) apne bare mein dastoor ke mutabiq karein. Mujahid ne kaha ke Allah Ta'ala ne aisi bewa ke liye saat mahine bees din saal bhar mein se wasiyyat qarar di. Agar wo chahe to shohar ki wasiyyat ke mutabiq wahin thehri rahe aur agar chahe (chaar mahine das din ki iddat) poori kar ke wahan se chali jaye. Allah Ta'ala ke irshad «Ghaira ikhrajin fa'in kharajna fala junaha alaikum» tak yaani ”Unhein nikala na jaye. Albatta agar wo khud chali jayein to tum par koi gunah nahi.“ ka yahi mansha hai. Pas iddat to jaisi ke pehle thi, ab bhi is par wajib hai. Ibn Abi Najeeh ne ise Mujahid se bayan kiya aur Ata ne bayan kiya ke Ibn Abbas Radi Allahu Anhuma ne kaha ke is pehli ayat ne bewa ko khawand ke ghar mein iddat guzarne ke hukm ko mansookh kar diya, is liye ab wo jahan chahe iddat guzare aur (isi tarah is ayat ne) Allah Ta'ala ke irshad «Ghaira ikhrajin» yaani ”Unhein nikala na jaye.“ (ko bhi mansookh kar diya hai). Ata ne kaha ke agar wo chahe to apne (shohar ke) ghar walon ke yahan hi iddat guzare aur wasiyyat ke mutabiq qiyam kare aur agar chahe wahan se chali aaye kyunke Allah Ta'ala ne farmaya hai «Fala junaha alaikum feema fa'alna» ilkh, yaani ”Pas tum par is ka koi gunah nahi, jo wo apni marzi ke mutabiq karein.“ Ata ne kaha ke is ke baad meeras ka hukm nazil hua aur is ne makan ke hukm ko mansookh kar diya. Pas wo jahan chahe iddat guzar sakti hai aur is ke liye (shohar ki taraf se) makan ka intezam nahi ho ga.