Hum se Muhammad bin Musanna ne byaan kiya , kaha hum se Yahya bin Saeed Qattan ne byaan kiya , kaha hum se Ismail bin Abi Khalid ne byaan kiya , kaha hum se Zayd bin Wahb ne byaan kiya ke hum Huzayfah bin Yaman ki khidmat mein hazir thay . Unhon ne kaha yeh aayat jin logon ke baare mein utri un mein se ab sirf teen shakhs baqi hain , isi tarah munafiqon mein se bhi ab char shakhs baqi hain . Itne mein ek dehati kehne laga Aap to Nabi Karim salla Allahu alaihi wasallam ke sahabi hain , hamain in logon ke mutalliq bataiye ke un ka kya hashr ho ga jo hamare gharon mein chhed kar ke achhi cheezin chura kar le jate hain ? Unhon ne kaha ke yeh log fasiq bad-kaar hain . Haan in munafiqon mein char ke siwa aur koi baqi nahi raha hai aur ek to itna burha ho chuka hai ke agar thanda pani peeta hai to is ki thand ka bhi usay pata nahi chalta .