Hum se Muhammad bin Yusuf ne byaan kiya , un se Warqa bin Amr Yashkuri ne , un se Ibn Abi Najih ne , un se Ata ne aur un se Ibn Abbas razi Allahu anhuma ne byaan kiya ke ibtida e Islam mein mayyit ka saara maal aulad ko milta tha , albatta walidain ko woh milta jo mayyit un ke liye wasiyat kar jaye , phir Allah Ta'ala ne jaisa munasib samjha is mein naskh kar diya . Chunanche ab mard ka hissa do auraton ke hisse ke barabar hai aur mayyit ke walidain yani in donon mein har ek ke liye is maal ka chhata hissa hai . Basharte ke mayyit ke koi aulad ho , lekin agar is ke koi aulad na ho , balkay is ke walidain hi is ke waris hon to is ki maan ka ek tihayi hissa ho ga aur biwi ka aathwan hissa ho ga , jabke aulad ho , lekin agar aulad na ho to chauthayi ho ga aur shohar ka aadha hissa ho ga , jabke aulad na ho lekin agar aulad ho to chauthayi ho ga .