Hum se Abdul Aziz bin Abdullah ne byaan kiya , unhon ne kaha hum se Ibrahim bin Saad ne byaan kiya , un se Salih bin Kaysan ne , un se Ibn Shihab ne , unhon ne kaha mujh ko Urwah bin Zubayr ne khabar di unhon ne Aisha razi Allahu anha se aayat «wa in khiftum alla tuqsitoo fil yatama» ka matlab poocha . Unhon ne kaha mere bhatije is ka matlab yeh hai ke ek yateem larki apne wali ki parwarish mein ho aur is ki jaidad ki hissa-dar ho (tarke ki roo se is ka hissa ho) ab is wali ko is ki maldari khubsoorti pasand aaye . Is se nikah karna chahe par insaf ke saath poora mahr jitna mahr is ko doosre log dein , na dena chahe , to Allah Ta'ala ne is aayat mein logon ko aaisi yateem larkiyon ke saath jab tak un ka poora mahr insaf ke saath na dein , nikah karne se mana farmaya aur un ko yeh hukm diya ke tum doosri auraton se jo tum ko bhali lagein nikah kar lo . (yateem larki ka nuqsan na karo) Urwah ne kaha Aisha razi Allahu anha kehti thien , is aayat ke utarne ke baad logon ne phir Nabi Karim salla Allahu alaihi wasallam se is baare mein masla poocha , is waqt Allah ne yeh aayat «wa yastaftoonaka fin-nisa'i» utari . Aisha razi Allahu anha ne kaha doosri aayat mein yeh jo farmaya «wa targhaboona an yankihuhunna» yani woh yateem larkiyan jin ka maal o jamal kam ho aur tum un ke saath nikah karne se nafrat karo . Is ka matlab yeh hai ke jab tum in yateem larkiyon se jin ka maal o jamal kam ho nikah karna nahi chahte to maal aur jamal wali yateem larkiyon se bhi jin se tum ko nikah karne ki raghbat hai nikah na karo , magar jab insaf ke saath un ka mahr poora ada karo .