Ibn Abbas razi Allahu anhuma ne kaha ke (Quran Majeed ki aayat) «yastankifa» , «yastakbira» ke maani mein hai . «qiyaman» yani jis par tumhare guzran ki buniad qaim hai . «lahunna sabeela» yani shaadi-shuda ke liye rajm aur kunware ke liye kore ki saza hai (jab woh zina karein) aur doosre logon ne kaha (aayat mein) «masna wa sulasa wa rubaa» se murad do do teen teen aur char char hain . Ahl e Arab «rubaa» se aage is wazan se tajawuz nahi karte .

Hum se Ibrahim bin Musa ne byaan kiya , kaha hum ko Hisham bin Yusuf ne khabar di , un se Ibn Jurayj ne kaha , kaha mujh ko Hisham bin Urwah ne khabar di , unhein un ke walid ne aur un se Aisha razi Allahu anha ne byaan kiya ke ek aadmi ki parwarish mein ek yateem larki thi , phir us ne is se nikah kar liya , is yateem larki ki milkiyat mein khajoor ka ek bagh tha . Isi bagh ki wajah se yeh shakhs is ki parwarish karta raha haalan ke dil mein is se koi khaas lagao na tha . Is silsile mein yeh aayat utri «wa in khiftum alla tuqsitoo fil yatama» ke ”agar tumhein andesha ho ke tum yateemon ke haq mein insaf na kar sako ge .“ Hisham bin Yusuf ne kaha main samajhta hoon , Ibn Jurayj ne yun kaha yeh larki is darakht aur doosre maal asbab mein is mard ki hissa-dar thi .