Hum se Ishaq bin Rahwayh ne byaan kiya , kaha hum se Rauh bin Ubadah ne byaan kiya , kaha hum se Shibl bin Abbad ne byaan kiya , un se Ibn Abi Najih ne aur unhon ne Mujahid se aayat «wallazhina yutawaffauna minkum wa yazharuna azwaajan» ”aur tum mein se jo log wafat pa jate hain aur biwiyan chhor jate hain .“ Ke baare mein (zamana e jahiliyat ki tarah) kaha ke iddat (yani char mahine das din ki) thi jo shohar ke ghar aurat ko guzarani zaroori thi . Phir Allah Ta'ala ne yeh aayat nazil ki «wallazhina yutawaffauna minkum wa yazharuna azwaajan wasiyyatun li-azwaajihim mataaan ilal hawli ghayra ikhrajin fa-in kharajna fala junaha alaykum fee ma faalna fee anfusihinna min maroofin» ”aur jo log tum mein se wafat pa jayein aur biwiyan chhor jayein un ko chahiye ke apni biwiyon ke haq mein nafa uthane ki wasiyat (kar jayein) ke woh ek saal tak ghar se na nikali jayein , lekin agar woh (khud) nikal jayein to koi gunah tum par nahi . Agar woh dastoor ke muwafiq apne liye koi kaam karein .“ Farmaya ke Allah Ta'ala ne aurat ke liye saat mahine aur bees din wasiyat ke qarar diye ke agar woh is muddat mein chahe to apne liye wasiyat ke mutabiq (shohar ke ghar mein hi) thehre aur agar chahe to kahin aur chali jaye ke agar aaisi aurat kahin aur chali jaye to tumhare haq mein koi gunah nahi . Pas iddat ke ayyam to wahi hain jinhein guzarna is par zaroori hai (yani char mahine das din) . Shibl ne kaha Ibn Abi Najih ne Mujahid se aisa hi naqal kiya hai aur Ata bin Abi Rabah ne kaha ke Ibn Abbas razi Allahu anhuma ne kaha , is aayat ne is rasm ko mansookh kar diya ke aurat apne khawand ke ghar walon ke paas iddat guzare . Is aayat ki roo se aurat ko ikhtiyar mila jahan chahe wahan iddat guzare aur Allah Paak ke qaul «ghayra ikhrajin» ka yahi matlab hai . Ata ne kaha , aurat agar chahe to apne khawand ke ghar walon mein iddat guzare aur khawand ki wasiyat ke muwafiq isi ke ghar mein rahe aur agar chahe to wahan se nikal jaye kyunke Allah Ta'ala ne farmaya «fala junaha alaykum fee ma faalna» ”agar woh nikal jayein to dastoor ke muwafiq apne haq mein jo baat karein is mein koi gunah tum par na ho ga .“ Ata ne kaha ke phir miras ka hukm nazil hua jo Surah Nisa mein hai aur is ne (aurat ke liye) ghar mein rakhne ke hukm ko mansookh qarar diya . Ab aurat jahan chahe iddat guzar sakti hai . Isay makan ka kharcha dena zaroori nahi aur Muhammad bin Yusuf ne riwayat kiya , un se Warqa bin Amr ne byaan kiya , un se Ibn Abi Najih ne aur un se Mujahid ne , yahi qaul byaan kiya aur farzandan e Ibn Abi Najih se naqal kiya , un se Ata bin Abi Rabah ne byaan kiya aur un se Ibn Abbas razi Allahu anhuma ne byaan kiya ke is aayat ne sirf shohar ke ghar mein iddat ke hukm ko mansookh qarar diya hai . Ab woh jahan chahe iddat guzar sakti hai . Jaisa ke Allah Ta'ala ke irshad «ghayra ikhrajin» waghaira se sabit hai .