Mujh se Ishaq bin Rahwayh ne byaan kiya , kaha hum ko Bishr bin Shuayb bin Abi Hamzah ne khabar di , kaha ke mujh se mere walid ne byaan kiya , un se Zuhri ne byaan kiya , unhein Abdullah bin Kabb bin Malik Ansari ne khabar di aur Kabb bin Malik razi Allahu anhu in teen sahabah mein se ek thay jin ki (Ghazwa Tabook mein shirkat na karne ki) tauba qabool hui thi . Unhein Abdullah bin Abbas razi Allahu anhuma ne khabar di ke Ali bin Abi Talib razi Allahu anhu Rasool Allah salla Allahu alaihi wasallam ke paas se bahar aaye . Yeh is marz ka waqia hai jis mein Aap salla Allahu alaihi wasallam ne wafat payi thi . Sahabah razi Allahu anhum ne Aap se poocha: Abu al-Hasan! Nabi Karim salla Allahu alaihi wasallam ka aaj mizaj kya hai ? Subah unhon ne bataya ke Alhamdulillah ab Aap ko afaqa hai . Phir Abbas bin Abdul Muttalib razi Allahu anhu ne Ali razi Allahu anhu ka hath pakar ke kaha ke tum , Allah ki qasam teen din ke baad zindagi guzarne par tum majboor ho jao ge . Allah ki qasam , mujhe to aise aasar nazar aa rahe hain ke Nabi Karim salla Allahu alaihi wasallam is marz se sehat nahi pa sakein ge . Maut ke waqt Banu Abdul Muttalib ke chehron ki mujhe khoob shinakht hai . Ab hamain Aap ke paas chalna chahiye aur Aap se poochna chahiye ke hamare baad khilafat kise mile gi . Agar hum is ke mustahiq hain to hamain maloom ho jaye ga aur agar koi doosra mustahiq ho ga to woh bhi maloom ho jaye ga aur Aap salla Allahu alaihi wasallam hamare mutalliq apne khaleefa ko mumkin hai kuch wasiyatein kar dein lekin Ali razi Allahu anhu ne kaha ke Allah ki qasam! Agar hum ne is waqt Aap se is ke mutalliq kuch poocha aur Aap ne inkar kar diya to phir log hamain hamesha ke liye is se mahroom kar dein ge . Main to hargiz Aap salla Allahu alaihi wasallam se is ke mutalliq kuch nahi poochoon ga .