Hum se Yusuf Bin Musa ne bayan kiya, kaha hum se Ubaidullah Bin Musa ne bayan kiya, un se Israil ne, un se Abu Ishaq ne aur un se Bara Bin Azib Radi Allahu Anhu ne bayan kiya ke Rasul Allah Sallallahu Alaihi Wasallam ne Abu Rafi Yahoodi (ke qatl) ke liye chand Ansari sahaba ko bheja aur Abdullah Bin Atik Radi Allahu Anhu ko in ka ameer banaya. Ye Abu Rafi Nabi Kareem Sallallahu Alaihi Wasallam ko eeza diya karta tha aur Aap ke dushmanon ki madad kiya karta tha. Hijaz mein is ka ek qila tha aur wahin wo raha karta tha. Jab is ke qila ke qareeb ye pahunche to sooraj ghuroob ho chuka tha. Aur log apne maweshi le kar (apne gharon ko) wapas ho chuke thay. Abdullah Bin Atik Radi Allahu Anhu ne apne sathiyon se kaha ke tum log yahin thahre raho mein (is qila par) ja raha hoon aur darban par koi tadbeer karunga. Taake mein andar jane mein kamyab ho jaon. Chunancha wo (qila ke pas) aaye aur darwaze ke qareeb pahunch kar unhon ne khud ko apne kapron mein is tarah chupa liya jaise koi qazaye hajat kar raha ho. Qila ke tamam aadmi andar dakhil ho chuke thay. Darban ne awaz di, Ai Allah ke bande! Agar andar aana hai to jald aa ja, mein ab darwaza band kar doonga. (Abdullah Bin Atik Radi Allahu Anhu ne kaha) chunancha mein bhi andar chala gaya aur chup kar is ki karrawayi dekhne laga. Jab sab log andar aa gaye to is ne darwaza band kiya aur kunjiyon ka guccha ek khoonti par latka diya. Unhon ne bayan kiya ke ab mein in kunjiyon ki taraf barha aur mein ne unhein le liya, phir mein ne qila ka darwaza khol liya. Abu Rafi ke pas raat ke waqt dastaanein bayan ki ja rahi thin aur wo apne khas balakhane mein tha. Jab dastaan-go is ke yahan se uth kar chale gaye to mein is kamre ki taraf charhne laga. Is arsa mein, mein jitne darwaze is tak pahunchne ke liye kholta tha unhein andar se band karta jata tha. Mera matlab ye tha ke agar qila walon ko mere mutaliq ilm bhi ho jaye to is waqt tak ye log mere pas na pahunch sakein jab tak mein ise qatl na kar loon. Aakhir mein is ke qareeb pahunch gaya. Is waqt wo ek tareek kamre in apne baal bachon ke sath (so raha) tha mujhe kuch andaza nahi ho saka ke wo kahan hai. Is liye mein ne awaz di, Ya Aba Rafi? Wo bola kaun hai? Ab mein ne awaz ki taraf barh kar talwar ki ek zarb lagayi. Is waqt mera dil dhak dhak kar raha tha. Yahi wajah hui ke mein is ka kaam tamam nahi kar saka. Wo cheekha to mein kamre se bahar nikal aaya aur thori der tak bahar hi thahra raha. Phir dubara andar gaya aur mein ne awaz badal kar pucha, Abu Rafi! Ye awaz kaisi thi? Wo bola teri maa gharat ho. Abhi abhi mujh par kisi ne talwar se hamla kiya hai. Unhon ne bayan kiya ke phir (awaz ki taraf barh kar) mein ne talwar ki ek zarb aur lagayi. Unhon ne bayan kiya ke agarche mein ise zakhmi to bahut kar chuka tha lekin wo abhi mara nahi tha. Is liye mein ne talwar ki noke is ke pait par rakh kar dabayi jo is ki peeth tak pahunch gayi. Mujhe ab yaqeen ho gaya ke mein ise qatl kar chuka hoon. Chunancha mein ne darwaze ek ek kar ke kholne shuru kiye. Aakhir mein ek zeene par pahuncha. Mein ye samjha ke zameen tak mein pahunch chuka hoon (lekin abhi mein pahuncha na tha) is liye mein ne is par paon rakh diya aur neeche gir para. Chandni raat thi. Is tarah gir parne se meri pindli toot gayi. Mein ne ise apne amama se baandh liya aur aa kar darwaze par baith gaya. Mein ne ye irada kar liya tha ke yahan se is waqt tak nahi jaonga jab tak ye na maloom kar loon ke aya mein ise qatl kar chuka hoon ya nahi? Jab murgh ne awaz di to isi waqt qila ki faseel par ek pukarne wale ne kharay ho kar pukara ke mein ahl-e-Hijaz ke tajir Abu Rafi ki maut ka elaan karta hoon. Mein apne sathiyon ke pas aaya aur un se kaha ke chalne ki jaldi karo. Allah Ta'ala ne Abu Rafi ko qatl kara diya. Chunancha mein Nabi Kareem Sallallahu Alaihi Wasallam ki khidmat mein hazir hua aur Aap ko is ki ittela di. Nabi Kareem Sallallahu Alaihi Wasallam ne farmaya ke apna paon phailao mein ne paon phailaya to Aap ne is par apna dast-e-mubarak phera aur paon itna accha ho gaya jaise kabhi is mein mujhko koi takleef hui hi na thi
.