Hum se Abu Moammar ne bayan kiya, kaha hum se Abdul Warith ne bayan kiya kaha hum se Abdul Aziz ne bayan kiya aur un se Anas bin Malik Radi Allahu Anhu ne bayan kiya ke ek shakhs pehle Isayi tha. Phir woh Islam mein dakhil ho gaya tha. Us ne Surah al-Baqarah aur Aal-e-Imran parh li thi aur woh Nabi Kareem Sallallahu Alaihi Wa Sallam ka munshi ban gaya lekin phir woh shakhs murtad ho kar Isayi ho gaya aur kehne laga ke Muhammad (Sallallahu Alaihi Wa Sallam) ke liye jo kuch mein ne likh diya hai is ke siwa unhein aur kuch bhi maloom nahi. Phir Allah Ta'ala ke hukm se us ki maut waqia ho gayi aur is ke aadmiyon ne ise dafan kar diya. Jab subah hui to unhon ne dekha ke is ki lash qabar se nikal kar zameen ke upar padi hai. Isayi logon ne kaha ke yeh Muhammad (Sallallahu Alaihi Wa Sallam) aur is ke sathiyon ka kaam hai. Chunke in ka deen us ne chhor diya tha is liye unhon ne is ki qabar khodi hai aur lash ko bahar nikal kar phenk diya hai. Chunanche doosri qabar unhon ne khodi jo bahut zyada gehri thi. Lekin jab subah hui to phir lash bahar thi. Is martaba bhi unhon ne yahi kaha ke yeh Muhammad (Sallallahu Alaihi Wa Sallam) aur un ke sathiyon ka kaam hai chunke in ka deen us ne chhor diya tha is liye is ki qabar khod kar unhon ne lash bahar phenk di hai. Phir unhon ne qabar khodi aur jitni gehri in ke bas mein thi kar ke ise is ke andar daal diya lekin subah hui to phir lash bahar thi. Ab unhein yaqeen aaya ke yeh kisi insan ka kaam nahi hai (balkay yeh mayyat Allah Ta'ala ke azab mein giraftar hai) chunanche unhon ne ise yunhi (zameen par) daal diya.