Mujh se Amr Bin Abbas ne bayan kiya, kaha hum se Abdur Rahman Bin Mahdi ne, kaha hum se Musanna ne, un se Abu Jamrah ne aur un se Ibn Abbas (Radi Allahu Anhuma) ne bayan kiya ke jab Abu Zar (Radi Allahu Anhu) ko Rasul Allah (Sallallahu Alaihi Wasallam) ki nubuwwat ke baare maloom hua to unhon ne apne bhai Anis se kaha Makkah jane ke liye sawari tayyar kar aur is shakhs ke mutaliq jo Nabi hone ka muddayi hai aur kehta hai ke is ke pas aasman se khabar aati hai, mere liye khabrein hasil kar ke la. Is ki baaton ko khud ghour se sunna aur phir mere pas aana. In ke bhai wahan se chale aur Makkah hazir ho kar Nabi Kareem (Sallallahu Alaihi Wasallam) ki baatein khud sunien phir wapas ho kar unhon ne Abu Zar (Radi Allahu Anhu) ko bataya ke mein ne unhein khud dekha hai, wo acche akhlaq ka logon ko hukam karte hain aur mein ne un se jo kalam suna wo sher nahi hai. Is par Abu Zar (Radi Allahu Anhu) ne kaha jis maqsad ke liye mein ne tumhein bheja tha mujhe is par poori tarah tashfi nahi hui. Aakhir unhon ne khud tosha bandha, pani se bhara hua ek purana mushkiza sath liya aur Makkah aaye. Masjid-ul-Haram mein haziri di aur yahan Nabi Kareem (Sallallahu Alaihi Wasallam) ko talash kiya. Abu Zar (Radi Allahu Anhu) Nabi Kareem (Sallallahu Alaihi Wasallam) ko pehchante nahi thay aur kisi se aap ke mutaliq poochna bhi munasib nahi samjha, kuch raat guzar gayi ke wo lete hue thay, Ali (Radi Allahu Anhu) ne un ko is halat mein dekha aur samajh gaye ke koi musafir hai. Ali (Radi Allahu Anhu) ne un se kaha aap mere ghar chal kar aaram kijiye. Abu Zar (Radi Allahu Anhu) in ke peeche peeche chale gaye lekin kisi ne ek doosre ke baare mein baat nahi ki. Jab subah hui to Abu Zar (Radi Allahu Anhu) ne apna mushkiza aur tosha uthaya aur Masjid-ul-Haram mein aa gaye. Ye din bhi yunhi guzar gaya aur wo Nabi Kareem (Sallallahu Alaihi Wasallam) ko na dekh sake. Shaam hui to sone ki tayyari karne lage. Ali (Radi Allahu Anhu) phir wahan se guzre aur samajh gaye ke abhi apne thikane jane ka waqt is shakhs par nahi aaya, wo unhein wahan se phir apne sath le aaye aur aaj bhi kisi ne ek doosre se baat cheet nahi ki, teesra din jab hua aur Ali (Radi Allahu Anhu) ne un ke sath yehi kaam kiya aur apne sath le gaye to un se poocha kya tum mujhe bata sakte ho ke yahan aane ka bais kya hai? Abu Zar (Radi Allahu Anhu) ne kaha ke agar tum mujh se pukhta waada kar lo ke meri raah numai karo ge to mein tum ko sab kuch bata doon ga. Ali (Radi Allahu Anhu) ne waada kar liya to unhon ne unhein apne khayalat ki khabar di. Ali (Radi Allahu Anhu) ne farmaya ke bilashuba wo haq par hain aur Allah ke sacche Rasul hain accha subah ko tum mere peeche peeche mere sath chalna. Agar mein (raste mein) koi aaisi baat dekhoon jis se mujhe tumhare baare mein koi khatra ho to mein khara ho jaoon ga (kisi diwar ke qareeb) goya mujhe peshab karna hai. Is waqt tum mera intezar mat karna aur jab mein phir chalne lagoon to mere peeche aa jana taake koi samajh na sake ke ye dono sath hain aur is tarah jis ghar mein, mein dakhil hoon tum bhi dakhil ho jana. Unhon ne aisa hi kiya aur peeche peeche chale ta-aanke Ali (Radi Allahu Anhu) ke sath wo Nabi Kareem (Sallallahu Alaihi Wasallam) ki khidmat mein pahunch gaye, aap (Sallallahu Alaihi Wasallam) ki baatein sunien aur waheen Islam le aaye. Phir Nabi Kareem (Sallallahu Alaihi Wasallam) ne un se farmaya ke ab apni qoum Ghifar mein wapas jao aur unhein mera haal batao ta-aanke jab hamare ghalba ka ilm tum ko ho jaye (to phir hamare pas aa jana). Abu Zar (Radi Allahu Anhu) ne arz kiya is zaat ki qasam! Jis ke hath mein meri jaan hai, mein in Quraishiyon ke majma mein pukar kar kalma-e-touheed ka elan karoon ga. Chunancha Nabi Kareem (Sallallahu Alaihi Wasallam) ke yahan se wapas wo Masjid-ul-Haram mein aaye aur buland aawaz se kaha «ashhadu alla ilaha illallah, wa anna muhammadan rasulullah» ”Mein gawahi deta hoon ke Allah ke siwa koi mabood nahi aur ye ke Muhammad Allah ke Rasul hain.“ Ye sunte hi un par sara majma tout para aur sab ne unhein itna mara ke zameen par lita diya. Itne mein Abbas (Radi Allahu Anhu) aa gaye aur Abu Zar (Radi Allahu Anhu) ke upar apne ko daal kar Quraish se unhon ne kaha afsos! Kya tumhein maloom nahi ke ye shakhs qabila Ghifar se hai aur Shaam jane wale tumhare tajiron ka rasta idhar hi se parta hai, is tarah se in se un ko bachaya. Phir Abu Zar (Radi Allahu Anhu) doosre din Masjid-ul-Haram mein aaye aur apne Islam ka izhaar kiya. Qoum phir buri tarah un par tout pari aur maarne lage. Is din bhi Abbas (Radi Allahu Anhu) un par oundhe par gaye
.

Hum se Zaid ne jo Akhzam ke bete hain, bayan kiya, kaha hum se Abu Qutaibah Salm Bin Qutaibah ne bayan kiya, un se Musanna Bin Saeed Qaseer ne bayan kiya, kaha ke mujh se Abu Jamrah ne bayan kiya, kaha ke hum se Abdullah Bin Abbas (Radi Allahu Anhuma) ne kaha ke kya mein Abu Zar (Radi Allahu Anhu) ke Islam ka waqia tumhein sunaoon? Hum ne arz kiya zaroor sunaiye. Unhon ne bayan kiya ke Abu Zar (Radi Allahu Anhu) ne batlayai. Mera talluq qabila Ghifar se tha. Hamare yahan ye khabar pahunchi thi ke Makkah mein ek shakhs paida hue hain jin ka dawa hai ke wo Nabi hain (pehle to) mein ne apne bhai se kaha ke is shakhs ke pas Makkah ja, is se guftagu kar aur phir is ke sare halat aa kar mujhe bata. Chunancha mere bhai khidmat-e-Nabwi mein hazir hue aur Nabi Kareem (Sallallahu Alaihi Wasallam) se mulaqat ki aur wapas aa gaye. Mein ne poocha ke kya khabar laye? Unhon ne kaha: Allah ki qasam! Mein ne aise shakhs ko dekha hai jo acche kaamon ke liye kehta hai aur bure kaamon se mana karta hai. Mein ne kaha ke tumhari baaton se to meri tashfi nahi hui. Ab mein ne toshe ka thaila aur chari uthayi aur Makkah aa gaya. Wahan mein kisi ko pehchanta nahi tha aur aap ke mutaliq kisi se poochte hue bhi darr lagta tha. Mein (sirf) Zamzam ka pani pee liya karta tha, aur Masjid-ul-Haram mein thehra hua tha. Unhon ne bayan kiya ke ek martaba Ali (Radi Allahu Anhu) mere samne se guzre aur bole maloom hota hai ke aap is shehar mein musafir hain. Unhon ne bayan kiya ke mein ne kaha: Jee haan. Bayan kiya ke to phir mere ghar chalo. Phir wo mujhe apne ghar sath le gaye. Bayan kiya ke mein aap ke sath sath gaya. Na unhon ne koi baat poocha aur na mein ne kuch kaha. Subah hui to mein phir Masjid-ul-Haram mein aa gaya taake Nabi Kareem (Sallallahu Alaihi Wasallam) ke baare mein kisi se poochoon lekin aap ke baare mein koi batane wala nahi tha. Bayan kiya ke phir Ali (Radi Allahu Anhu) mere samne se guzre aur bole ke kya abhi tak aap apne thikane ko nahi paa sake hain? Bayan kiya, mein ne kaha ke nahi. Unhon ne kaha ke accha phir mere sath aaiye. Unhon ne bayan kiya ke phir Ali (Radi Allahu Anhu) ne poocha. Aap ka matlab kya hai. Aap is shehar mein kyun aaye? Unhon ne bayan kiya ke mein ne kaha: Aap agar zahir na karein to mein aap ko apne maamle ke baare mein bataoon. Unhon ne kaha ke mein aisa hi karoon ga. Tab mein ne un se kaha. Humein maloom hua hai ke yahan koi shakhs paida hue hain jo nubuwwat ka dawa karte hain. Mein ne pehle apne bhai ko un se baat karne ke liye bheja tha. Lekin jab wo wapas hue to unhon ne mujhe koi tashfi bakhsh ittila-at nahi dein. Is liye mein is irada se aaya hoon ke un se khud mulaqat karoon. Ali (Radi Allahu Anhu) ne kaha ke aap ne accha rasta paya ke mujh se mil gaye. Mein unhein ke pas ja raha hoon. Aap mere peeche peeche chalein. Jahan mein dakhil hoon aap bhi dakhil ho jayein. Agar mein kisi aise aadmi ko dekhoon ga jis se aap ke baare mein mujhe khatra hoga to mein kisi diwar ke pas khara ho jaoon ga, goya ke mein apna joota theek kar raha hoon. Is waqt aap aage barh jayein chunancha wo chale aur mein bhi un ke peeche ho liya aur aakhir mein wo ek makan ke andar gaye aur mein bhi un ke sath Nabi Kareem (Sallallahu Alaihi Wasallam) ki khidmat mein andar dakhil ho gaya. Mein ne Nabi Kareem (Sallallahu Alaihi Wasallam) se arz kiya ke Islam ke usool-o-arkan mujhe samajha dijiye. Aap (Sallallahu Alaihi Wasallam) ne mere samne un ki wazahat farmayi aur mein Musalman ho gaya. Phir Aap (Sallallahu Alaihi Wasallam) ne farmaya ke ae Abu Zar! Is maamle ko abhi poshida rakhna aur apne shehar ko chale jana. Phir jab tumhein hamare ghalba ka haal maloom ho jaye tab yahan dobara aana. Mein ne arz kiya is zaat ki qasam jis ne aap ko haq ke sath mabous kiya hai mein to in sab ke samne Islam ke kalma ka elan karoon ga. Chunancha wo Masjid-ul-Haram mein aaye. Quraish ke log wahan maujood thay aur kaha, ae Quraish ki jamaat! (Suno) mein gawahi deta hoon ke Allah ke siwa koi mabood nahi aur mein gawahi deta hoon ke Muhammad is ke bande aur is ke Rasul hain. Quraishiyon ne kaha ke is bad-deen ki khabar lo. Chunancha wo meri taraf lapke aur mujhe itna mara ke mein marne ke qareeb ho gaya. Itne mein Abbas (Radi Allahu Anhu) aa gaye aur mujh par gir kar mujhe apne jism se chupa liya aur Quraishiyon ki taraf tawajjo ho kar unhon kaha. Arey nadano! Qabila Ghifar ke aadmi ko qatl karte ho. Ghifar se to tumhari tijarat bhi hai aur tumhare qafle bhi is taraf se guzarte hain. Is par unhon ne mujhe chor diya. Phir jab doosri subah hui to phir mein Masjid-ul-Haram mein aaya aur jo kuch mein ne kal pukara tha isi ko phir dohraya. Quraishiyon ne phir kaha: Pakro is bad-deen ko. Jo kuch unhon ne mere sath kal kiya tha wohi aaj bhi kiya. Ittifaq se phir Abbas Bin Abdul Muttalib (Radi Allahu Anhu) aa gaye aur mujh par gir kar mujhe apne jism se unhon ne chupa liya aur jaisa unhon ne Quraishiyon se kal kaha tha waisa hi aaj bhi kaha. Abdullah Bin Abbas (Radi Allahu Anhuma) ne kaha ke Abu Zar (Radi Allahu Anhu) ke Islam qabool karne ki ibtida is tarah se hui thi
.