«kahfun» pahar mein jo darra ho. «raqimun» ke maani likhi hui kitab. «marqumun» ke maani bhi likhi hui. «rabatna ala qulubihim» hum ne un ke dilon mein sabar dala. «shatatan» zulm aur zyada-ti. «waseedun» ke maani lagan aur sehan is ki jama «wasa-idu» aur «wusudun» aati hai. «waseedun» darwaze ko bhi kehte hain. (Dehleez) ko «mu-sadatun» jo Surah Humazah mein hai yani band darwaza lagi hui Arab log kehte hain. «asadal baba» aur «ausadal baba» yani darwaza band kiya. «ba-athnahum» hum ne un ko zinda kar diya. «azka» yani zyada sone wala ya pakiza khush maza ya sust. «fazarraballahu ala azanihim» yani Allah Ta'ala ne un ko sula diya. «rajman bil-ghaibi» yani be-daleel (mahz guman atkal pacho). Mujahid ne kaha «taqrizuhum» yani chor deta hai katra jata hai. Surah Al-Kahf mein in jawanon ka tafseeli zikr maujood hai

Hum se Ismail Bin Khalil ne bayan kiya kaha hum ko Ali Bin Mushir ne khabar di unhein Ubaidullah Bin Umar unhein Nafay ne aur unhein Ibn Umar (Radi Allahu Anhuma) ne ke Rasul Allah (Sallallahu Alaihi Wasallam) ne farmaya "Pichle zamane mein (Bani Israel mein se) teen aadmi kaheen raste mein ja rahe thay ke achanak barish ne unhein aa liya. Wo teenon pahar ke ek khouh (ghaar) mein ghus gaye (jab wo andar chale gaye) to ghaar ka munh band ho gaya. Ab teenon aapas mein yun kehne lage ke Allah ki qasam humein is musibat se ab to sirf sachayi hi najaat dilaye gi. Behtar ye hai ke ab har shakhs apne kisi aise amal ko bayan kar ke dua kare jis ke baare mein ise yaqeen ho ke wo khalis Allah Ta'ala ki raza mandi ke liye kiya tha. Chunancha ek ne is tarah dua ki. Ae Allah! Tujh ko khoob maloom hai ke mein ne ek mazdoor rakkha tha jis ne ek faraq (teen saa) chawal ki mazdoori par mera kaam kiya tha lekin wo shakhs (ghussa mein aa kar) chala gaya aur apne chawal chor gaya. Phir mein ne is ek faraq chawal ko liya aur is ki kasht ki. Is se itna kuch ho gaya ke mein ne paidawar mein se gaye bail khareed liye. Is ke bahut din baad wohi shakhs mujh se apni mazdoori maangne aaya. Mein ne kaha ke ye gaye bail kharay hain in ko le ja. Is ne kaha ke mera to sirf ek faraq chawal tum par hona chahiye tha. Mein ne is se kaha ye sab gaye bail le ja kyunke isi ek faraq ki amdani hai. Aakhir wo gaye bail le kar chala gaya. Pas ae Allah! Agar tu janta hai ke ye imandari mein ne sirf tere darr se ki thi to tu ghaar ka munh khol de. Chunancha isi waqt wo patthar kuch hat gaya. Phir doosre ne is tarah dua ki. Ae Allah! Tujhe khoob maloom hai ke mere maan baap jab boodhe ho gaye to mein un ki khidmat mein rozana raat mein apni bakriyon ka doodh la kar pilaya karta tha. Ek din ittifaq se mein dair se aaya to wo so chuke thay. Idhar mere biwi aur bacche bhook se bilbila rahe thay lekin meri aadat thi ke jab tak walidain ko doodh na pila loon biwi bacchon ko nahi deta tha mujhe unhein bidaar karna bhi pasand nahi tha aur chorna bhi pasand na tha (kyunke yehi un ka shaam ka khana tha aur is ke na peene ki wajah se wo kamzor ho jate) pas mein un ka waheen intezar karta raha yahan tak ke subah ho gayi. Pas agar tere ilm mein bhi mein ne ye kaam tere khauf ki wajah se kiya tha to tu hamari mushkil door kar de. Is waqt wo patthar kuch aur hat gaya aur ab aasman nazar aane laga. Phir teesre shakhs ne yun dua ki. Ae Allah! Meri ek chacha zaad behen thi jo mujhe sab se zyada mehboob thi. Mein ne ek baar is se suhbat karni chahi is ne inkar kiya magar is shart par tayyar hui ke mein ise sou ashrafi la kar de doon. Mein ne ye raqam hasil karne ke liye koshish ki. Aakhir wo mujhe mil gayi to mein is ke pas aaya aur wo raqam is ke hawale kar di. Is ne mujhe apne nafs par qudrat de di. Jab mein is ke dono paon ke darmiyan baith chuka to is ne kaha ke Allah se darr aur muhar ko baghair haq ke na tor. Mein (ye sunte hi) khara ho gaya aur sou ashrafi bhi wapas nahi li. Pas agar tere ilm mein bhi mein ne ye amal tere khauf ki wajah se kiya tha to tu hamari mushkil aasan kar de. Allah Ta'ala ne un ki mushkil door kar di aur wo teenon bahar nikal aaye."