Umar Bin Abdul Aziz (Rahimahullah) ne kaha ke Nabi Kareem (Sallallahu Alaihi Wasallam) ne tamam rishtedaron ko nahi diya aur is ki bhi riyayait nahi ki ke jo qareebi rishtedar ho isi ko dein. Balki jo zyada muhtaj hota, Aap ise inayait farmate, khwah rishta mein wo door hi kyun na ho. Agarchay Aap ne jin logon ko diya wo yahi dekh kar wo muhtaji ka Aap se shikwa karte thay aur ye bhi dekh kar ke Nabi Kareem (Sallallahu Alaihi Wasallam) ki janib-dari aur taraf-dari mein un ko jo nuqsan apni qaum walon aur un ke ham-qasmon se pahuncha (wo bahut tha)
.

Hum se Abdullah Bin Yusuf ne bayan kiya, unhon ne kaha hum se Laith ne bayan kiya, un se Aqeel ne bayan kiya, un se Ibn Shihab ne bayan kiya, un se Ibn Musayyab ne bayan kiya aur un se Jubair Bin Mut'im (Radi Allahu Anhu) ne bayan kiya ke mein aur Usman Bin Affan (Radi Allahu Anhu) Rasul Allah (Sallallahu Alaihi Wasallam) ki khidmat mein hazir hue aur arz kiya, Ya Rasul Allah! Aap ne Banu Muttalib ko to inayait farmaya lekin hum ko chhod diya, halanke hum ko Aap se wahi rishta hai jo Banu Muttalib ko Aap se hai. Nabi Kareem (Sallallahu Alaihi Wasallam) ne farmaya ke Banu Muttalib aur Banu Hashim ek hi hai. Laith ne bayan kiya ke mujh se Yunus ne bayan kiya aur (is riwayat mein) ye ziyadati ki ke Jubair (Radi Allahu Anhu) ne kaha Nabi Kareem (Sallallahu Alaihi Wasallam) ne Banu Abd-e-Shams aur Banu Naufal ko nahi diya tha, aur Ibn Ishaq (Sahib-e-Maghazi) ne kaha hai ke Abd-e-Shams, Hashim aur Muttalib ek maan se thay aur un ki maan ka naam Aatika Bin Murra tha aur Naufal baap ki taraf se un ke bhai thay (un ki maan doosri theen)
.