Hum se Ishaq Bin Yazid Damishqi ne bayan kiya, kaha hum se Yahya Bin Hamza ne bayan kiya, kaha ke mujh se Sour Bin Yazid ne bayan kiya, un se Khalid Bin Ma'dan ne aur un se Umair Bin Aswad Ansi ne bayan kiya ke wo Ubadah Bin Samit (Radi Allahu Anhu) ki khidmat mein hazir hue. Aap ka qiyam sahil-e-Hims par apne hi ek makan mein tha aur aap ke sath (aap ki biwi) Umm-e-Haram (Radi Allahu Anha) bhi thiin. Umair ne bayan kiya ke hum se Umm-e-Haram (Radi Allahu Anha) ne bayan kiya ke mein ne Nabi Kareem (Sallallahu Alaihi Wasallam) se suna hai, aap (Sallallahu Alaihi Wasallam) ne farmaya tha ke meri ummat ka sab se pehla lashkar jo daryayi safar kar ke jihad ke liye jaye ga, us ne (apne liye Allah Ta'ala ki rahmat o maghfirat) wajib kar li. Umm-e-Haram (Radi Allahu Anha) ne bayan kiya ke mein ne kaha tha ya Rasul Allah! Kya mein bhi un ke sath hoongi? Aap (Sallallahu Alaihi Wasallam) ne farmaya ke haan, tum bhi un ke sath hoogi. Phir Nabi Kareem (Sallallahu Alaihi Wasallam) ne farmaya sab se pehla lashkar meri ummat ka jo Qaisar (Roomiyon ke badshah) ke shehr (Qustuntunia) par charhayi kare ga un ki maghfirat hogi. Mein ne kaha mein bhi un ke sath hoongi ya Rasul Allah! Aap (Sallallahu Alaihi Wasallam) ne farmaya ke nahi
.