Hum se Abdullah Bin Abdul Wahab ne bayan kiya, kaha hum se Khalid Bin Haris ne bayan kiya, kaha hum se Ibn Aun ne bayan kiya, un se Musa Bin Anas ne bayan kiya jung-e-Yamama ka wo zikr kar rahe thay, bayan kiya ke Anas Bin Malik (Radi Allahu Anhu) Sabit Bin Qais (Radi Allahu Anhu) ke yahan gaye, unhon ne apni ran khol rakhi thi aur khushbu laga rahe thay. Anas (Radi Allahu Anhu) ne kaha chacha! Ab tak aap jung mein kyun tashreef nahi laye? Unhon ne jawab diya ke bete abhi aata hoon aur wo phir khushbu lagane lage phir (kafan pehen kar tashreef laye aur baith gaye, murad saff mein shirkat se hai) Anas (Radi Allahu Anhu) ne guftagu karte hue musalmanon ki taraf se kuch kamzori ke aasar ka zikr kiya to unhon ne farmaya ke hamare samne se hat jao taake hum kafiron se dast-ba-dast larein, Rasul Allah (Sallallahu Alaihi Wasallam) ke sath hum aisa kabhi nahi karte thay. (Yani pehli saff ke log dat kar larte thay kamzori ka hargiz muzahira nahi hone dete thay) Tum ne apne dushmanon ko bahut buri cheez ka aadi bana diya hai (tum jung ke mauqe par peeche hat gaye) wo hamla karne lage. Is hadees ko Hammad ne Sabit se aur unhon ne Anas (Radi Allahu Anhu) se riwayat kiya
.