Hum se Muhammad Bin Sinan ne bayan kiya, kaha ke hum se Fulaih ne bayan kiya, un se Hilal ne bayan kiya, un se Ata Bin Yasar ne aur un se Abu Saeed Khudri (Radi Allahu Anhu) ne ke Rasul Allah (Sallallahu Alaihi Wasallam) minbar par tashreef laye aur farmaya mere baad tum par duniya ki jo barkatein khol di jayein gi, mein tumhare bare mein un se dar raha hoon ke (kahin tum un mein mubtala na ho jao) is ke baad Aap (Sallallahu Alaihi Wasallam) ne duniya ki ranginiyon ka zikr farmaya. Pehle duniya ki barakat ka zikr kiya phir is ki ranginiyon ko bayan farmaya, itne mein ek sahabi khare hue aur arz kiya ya Rasul Allah! Kya bhalayi, burayi paida kar de gi. Aap (Sallallahu Alaihi Wasallam) is par thori der ke liye khamosh ho gaye. Hum ne samjha ke Aap (Sallallahu Alaihi Wasallam) par wahy nazil ho rahi hai. Sab log khamosh ho gaye jaise un ke saron par parinde hon. Is ke baad Aap (Sallallahu Alaihi Wasallam) ne chehra mubarak se pasina saaf kiya aur daryaft farmaya sawal karne wala kahan hai? Kya ye bhi (maal aur duniya ki barakat) khair hai? Teen martaba Aap (Sallallahu Alaihi Wasallam) ne yahi jumla dohraya phir farmaya dekho bahaar ke mausam mein jab hari ghaas paida hoti hai, wo janwar ko maar dalti hai ya marne ke qareeb kar deti hai magar wo janwar bach jata hai jo hari hari doob charta hai, kokhein bharte hi sooraj ke samne ja khara hota hai. Leed, gobar, peshab karta hai phir is ke hazm ho jaane ke baad aur charta hai, isi tarah ye maal bhi hara bhara aur sheerin hai aur musalman ka wo maal kitna umdah hai jise us ne halal tariqon se jama kiya ho aur phir use Allah ke raste mein (jihad ke liye) yatimon ke liye miskinon ke liye waqf kar diya ho lekin jo shakhs najayez tariqon se jama karta hai to wo ek aisa khane wala hai jo kabhi aasuda nahi hota aur wo maal qayamat ke din is ke khilaf gawah ban kar aaye ga
.