Aur Jabir Bin Abdullah (Radi Allahu Anhuma) ne mukatib ke baare mein kaha ke un ki (yaani mukatib aur us ke malik ki) jo shartein hon wo muatabar hon gi aur Ibn Umar ya Umar (Radi Allahu Anhu) ne (rawi ko shuba hai) kaha ke har wo shart jo Kitabullah ke mukhalif ho wo baatil hai khwah aisi so shartein bhi lagayi jayein. Abu Abdullah (Imam Bukhari Rahimahullah) ne kaha ke bayan kiya jata hai ke Umar aur Ibn Umar (Radi Allahu Anhuma) dono se ye qaul marwi hai
.

Hum se Ali Bin Abdullah Madini ne bayan kiya . Kaha hum se Sufyan Bin Uyainah ne bayan kiya ' Yahya Bin Saeed Ansari se ' un se Amrah ne aur un se Aisha (Radi Allahu Anha) ne bayan kiya ke Barirah (Radi Allahu Anha) apne mukatabat ke silsile mein un se madad mangne aayin to unhon ne kaha ke agar tum chaho to tumhare malkon ko (poori qeemat) de doon aur tumhari wala mere hogi. Phir jab Rasul Allah (Sallallahu Alaihi Wasallam) tashreef laye to Aap (Sallallahu Alaihi Wasallam) se mein ne is ka zikr kiya. Aap (Sallallahu Alaihi Wasallam) ne farmaya unhein to khareed le aur azad kar de. Wala to baharhaal usi ki hogi jo azad kar de. Phir Rasul Allah (Sallallahu Alaihi Wasallam) minbar par tashreef laye aur farmaya in logon ko kya ho gaya hai jo aisi shartein lagate hain jin ka koi pata (daleel, sanad) Kitabullah mein nahi hai ' jis ne bhi koi aisi shart lagayi jis ka pata (daleel, sanad) Kitabullah mein na ho to khwah aisi so shartein laga le un se kuch faida na uthayega
.