Is bab mein Abu Sufyan (Radi Allahu Anhu) ki hadees hai
.

Aof Bin Malik (Radi Allahu Anhu) ne Nabi Kareem (Sallallahu Alaihi Wasallam) se Riwayat kiya ke ek din aaye ga ke phir tumhari Roomiyou se sula ho jaye gi. Is bab mein Sahl Bin Hunaif, Asma aur Miswar (Radi Allahu Anhum) ki bhi Nabi Kareem (Sallallahu Alaihi Wasallam) se Riwayaat hain
.

Musa Bin Masood ne bayan kiya ke hum se Sufyan Bin Saeed ne bayan kiya, un se Abu Ishaq ne aur un se Bara Bin Azib (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne sula Hudaybiya mushrikeen ke sath teen sharait par ki thi, (1) ye ke mushrikeen mein se agar koi aadmi Aap (Sallallahu Alaihi Wasallam) ke paas aa jaye to Aap (Sallallahu Alaihi Wasallam) ise wapas kar dein ge. Lekin agar Musalmanon mein se koi mushrikeen ke yahan panah le ga to ye log aise shaks ko wapas nahi karein ge. (2) ye ke Aap (Sallallahu Alaihi Wasallam) aayinda saal Makkah aa sakein ge aur sirf teen din thehrein ge. (3) ye ke hathiyar, talwar, teer waghera niyam aur tarkash mein daal kar hi Makkah mein dakhil hon ge. Chunanchay Abu Jandal (Radi Allahu Anhu) (jo Musalman ho gaye thay aur Quraish ne in ko qaid kar rakkha hua tha) beriyou ko ghaseette hue aaye, to Aap (Sallallahu Alaihi Wasallam) ne unhein (sharait-e-muahida ke mutabiq) mushrikou ko wapas kar diya. Imam Bukhari (Rahimahullah) ne kaha ke Momil ne Sufyan se Abu Jandal ka zikar nahi kiya hai aur "illa bi-julban-us-silaah" ke bajaye "illa bi-julab-us-silaah" ke alfaz naqal kiye hain
.