Aur Allah Ta'ala ne (Surah Al-Noor mein) farmaya "Wassalihina min ibadikum wa imaikum" "Aur tumhare ghalamou aur tumhari bandiyou mein jo naik bakht hain" aur (Surah Al-Nahl mein farmaya) "Abdan mamlookan" "Mamlook ghalam" neez (Surah Yusuf mein farmaya) "Wa alfaya sayyidaha ladal-baab" "Aur donon (Yusuf aur Zulaikha) ne apne aaqa (Aziz-e-Misr) ko darwaze par paya." Aur Allah Ta'ala ne (Surah Nisa mein) farmaya "Min fatayatikumul-mominat" "Tumhari Musalman bandiyou mein se" aur Nabi Kareem (Sallallahu Alaihi Wasallam) ne farmaya "Apne sardar ko lene ke liye utho (Saad Bin Muaz Radi Allahu Anhu ke liye)" aur Allah Ta'ala ne Surah Yusuf mein farmaya "Uzkurni inda rabbika" "(Yusuf ne apne jail khana ke sathi se kaha tha ke) apne sardar (hakim) ke yahan mera zikar kar dena." Aur Nabi Kareem (Sallallahu Alaihi Wasallam) ne (Banu Salama se daryaft farmaya tha ke) "Tumhara sardar kaun hai?"
.

Hum se Musaddad Bin Musarhad ne bayan kiya, kaha hum se Yahya Qattan ne bayan kiya, un se Ubaidullah ne, un se Nafi ne kaha aur un se Abdullah Bin Umar (Radi Allahu Anhuma) ne ke Rasul Allah (Sallallahu Alaihi Wasallam) ne farmaya "Jab ghalam apne aaqa ki khair khwahi kare aur apne rabb ki ibadat tamam husn-o-khoobi ke sath baja laye to ise dugna sawab milta hai."
.