Aur Allah Ta'ala ne Surah Ibrahim mein farmaya ”aur zalimon ke kaamon se Allah Ta'ala ko ghafil na samajhna. Aur Allah Ta'ala to unhein sirf ek aise din ke liye muhlat day raha hai jis mein aankhein patthra jayeingi. Aur wo sar oopar ko uthaye bhage ja rahe honge. «مقنع» aur «مقمح» donon ke maane ek hi hain. Mujahid ne farmaya ke «مهطعين» ke maane barabar nazar dalne wale hain aur ye bhi kaha gaya hai ke «مهطعين» ke maani jaldi bhagne wala, in ki nigah khud in ki taraf na laute gi. Aur dilon ke chhakke chhoot jayeinge ke aql bilkul nahi rahegi aur Allah Ta'ala ka farman ke ay Muhammad! logon ko is din se darao jis din un par azab aa utre ga, jo log zulm kar chuke hain. Wo kaheinge ke ay humare Parwardigar! (azab ko) kuch dinon ke liye hum se aur muakhkhar kar day, to ab ki baar hum tera hukum sun leinge aur tere Ambiya ki tabeidari kareinge. Jawab milega kya tum ne pehle ye qasam nahi khayi thi ke tum par kabhi zawal nahi aaye ga ? Aur tum in qaumon ki bastiyon mein reh chuke ho jinhon ne apni janon par zulm kiya tha aur tum par ye bhi zahir ho chuka tha ke hum ne in ke sath kya muamla kiya. Hum ne tumhare liye misalein bhi bayan kar di hain. Unhon ne bure makar ikhtiyar kiye aur Allah ke yahan in ke ye badtareen makar likh liye gaye. Agarchay in ke makar aise thay ke in se pahar bhi hil jate (magar wo sab bekar sabit hue) pas Allah ke mutalliq hargiz ye khayal na karna ke wo apne Ambiya se kiye hue waadon ke khilaf karega. Bilashuba Allah ghalib aur badla lene wala hai
.

Hum se Ishaq Bin Ibrahim ne bayan kiya, unhon ne kaha ke hum ko Muaz Bin Hisham ne khabar di, unhon ne kaha ke hum se in ke baap ne bayan kiya, un se Qatadah ne, un se Abul Mutawakkil Naaji ne aur un se Abu Saeed Khudri (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya, jab mominon ko dozakh se najat mil jaye gi to unhein ek pul par jo Jannat aur dozakh ke darmiyan ho ga rok liya jaye ga aur wahin in ke mazalim ka badla day diya jaye ga. Jo wo duniya mein baham karte thay. Phir jab paak saaf ho jayeinge to unhein Jannat mein dakhla ki ijazat di jaye gi. Is zaat ki qasam! jis ke hath mein Muhammad ki jaan hai, in mein se har shakhs apne Jannat ke ghar ko apne duniya ke ghar se bhi behtar taur par pehchane ga. Yunus Bin Muhammad ne bayan kiya ke hum se Shaiban ne bayan kiya, un se Qatadah ne aur un se Abul Mutawakkil ne bayan kiya
.