Hum se Abdullah Bin Yusuf ne bayan kiya, kaha ke hum ko Imam Malik ne khabar di, unhein Ibn Shihab ne, unhein Urwah Bin Zubair (Radi Allahu Anhu) ne, unhein Abdur Rahman Bin Abdul Qaari ne ke unhon ne Umar Bin Khattab (Radi Allahu Anhu) se suna ke wo bayan karte thay ke mein ne Hisham Bin Hakim Bin Hizam (Radi Allahu Anhu) ko Surah Al-Furqan ek dafa is qirat se parhte suna jo is ke khilaf thi jo mein parhta tha. Halankay meri qirat khud Rasul Allah (Sallallahu Alaihi Wasallam) ne mujhe sikhayi thi. Qareeb tha ke mein furan hi un par kuch kar baithoon, lekin mein ne unhein muhlat di ke wo (namaz se) farigh ho lein. Is ke baad mein ne un ke gale mein chadar daal kar in ko ghaseeta aur Rasul Allah (Sallallahu Alaihi Wasallam) ki khidmat mein hazir kiya. Mein ne Aap (Sallallahu Alaihi Wasallam) se kaha ke mein ne unhein is qirat ke khilaf parhte suna hai jo Aap ne mujhe sikhayi hai. Aap (Sallallahu Alaihi Wasallam) ne mujh se farmaya ke pehle unhein chhor day. Phir in se farmaya ke accha ab tum qirat sunao. Unhon ne wahi apni qirat sunayi. Aap (Sallallahu Alaihi Wasallam) ne farmaya ke isi tarah nazil hui thi. Is ke baad mujh se Aap (Sallallahu Alaihi Wasallam) ne farmaya ke ab tum bhi parho, mein ne bhi parh kar sunaya. Aap (Sallallahu Alaihi Wasallam) ne is par farmaya ke isi tarah nazil hui. Quran saat qiraton mein nazil hua hai. Tum ko jis mein aasani ho isi tarah se parh liya karo
.