Hum se Ibrahim Bin Musa ne bayan kiya, kaha hum ko Hisham ne khabar di, unhein Ibn Jurayj ne khabar di, kaha ke mujhe Ibn Shihab ne khabar di, unhein Zaid-ul-Aabideen Ali Bin Husain Bin Ali (Radi Allahu Anhuma) ne, un se in ke walid Husain Bin Ali (Radi Allahu Anhuma) ne ke Ali Bin Abi Talib (Radi Allahu Anhu) ne bayan kiya ke Rasul Allah (Sallallahu Alaihi Wasallam) ke sath Badr ki larayi ke mauqe par mujhe ek jawan oontni ghanimat mein mili thi aur ek doosri oontni mujhe Rasul Allah (Sallallahu Alaihi Wasallam) ne inayat farmayi thi. Ek din ek Ansari Sahabi ke darwaze par mein in donon ko is khayal se bandhe hue tha ke in ki peeth par idhkhir (Arab ki ek khushbudar ghas jise sunar waghairah istemal karte thay) rakh kar bechne lay jaonga. Bani Qainuqa ka ek sunar bhi mere sath tha. Is tarah (khayal ye tha ke) is ki amadani se Fatimah (Radi Allahu Anha) (jin se mein nikah karne wala tha un) ka walimah karunga. Hamza Bin Abdul Muttalib (Radi Allahu Anhu) isi (Ansari ke) ghar mein sharab pee rahe thay. In ke sath ek gane wali bhi thi. Us ne jab ye misra parha: ”Han: ay Hamza! utho, farbah jawan oontniyon ki taraf“ (barh) Hamza (Radi Allahu Anhu) josh mein talwar lay kar uthe aur donon oontniyon ke kohan cheer diye. In ke pait phar dale. Aur in ki kaleji nikal li (Ibn Jurayj ne bayan kiya ke) mein ne Ibn Shihab se poocha, kya kohan ka gosht bhi kaat liya tha. To unhon ne bayan kiya ke in donon ke kohan kaat liye aur unhein lay gaye. Ibn Shihab ne bayan kiya ke Ali (Radi Allahu Anhu) ne farmaya, mujhe ye dekh kar badi takleef hui. Phir mein Nabi Kareem (Sallallahu Alaihi Wasallam) ki khidmat mein hazir hua. Aap ki khidmat mein is waqt Zaid Bin Harisah (Radi Allahu Anhu) bhi maujood thay. Mein ne Aap ko is waqia ki ittila di to Aap tashreef laye. Zaid (Radi Allahu Anhu) bhi Aap ke sath hi thay aur mein bhi Aap ke sath tha. Nabi Kareem (Sallallahu Alaihi Wasallam) jab Hamza (Radi Allahu Anhu) ke paas pahunche aur Aap (Sallallahu Alaihi Wasallam) ne khafgi zahir farmayi to Hamza ne nazar utha kar kaha ”Tum sab mere baap dada ke ghulam ho.“ Nabi Kareem (Sallallahu Alaihi Wasallam) ulte paon laut kar in ke paas se chale aaye. Ye sharab ki hurmat se pehle ka qissa hai
.