Aur Ali (Radi Allahu Anhu) ne Kufah mein waeran ilaqon ko aabaad karne ke liye yahi hukum diya tha. Aur Umar (Radi Allahu Anhu) ne farmaya ke jo koi banjar zameen ko aabaad kare, wo isi ki ho jati hai. Aur Umar (Radi Allahu Anhu) aur Ibn Auf (Radi Allahu Anhu) se bhi yahi riwayat hai. Albatta Ibn Auf (Radi Allahu Anhu) ne Nabi Kareem (Sallallahu Alaihi Wasallam) se (apni riwayat mein) ye ziyadati ki hai ke bashart-e-ke wo (ghair-aabaad zameen) kisi Musalman ki na ho, aur zalim rag wale ka zameen mein koi haq nahi hai. Aur is silsile mein Jabir (Radi Allahu Anhu) ki bhi Nabi Kareem (Sallallahu Alaihi Wasallam) se ek aisi hi riwayat hai
.

Hum se Yahya Bin Bukair ne bayan kiya, un se Laith Bin Saad ne bayan kiya, un se Ubaidullah Bin Abi Jafar ne bayan kiya, un se Muhammad Bin Abdur Rahman ne, un se Urwah ne aur un se Aisha (Radi Allahu Anha) ne ke Nabi Kareem (Sallallahu Alaihi Wasallam) ne farmaya jis ne koi aisi zameen aabaad ki, jis par kisi ka haq nahi tha to is zameen ka wahi haqdar hai. Urwah ne bayan kiya ke Umar (Radi Allahu Anhu) ne apne ahad-e-khilafat mein yahi faisla kiya tha
.