Allah Ta'ala ne farmaya ke ”Ae Iman walo! daro Allah se, aur chor do wasooli un raqmon ki jo baqi reh gayi hain logon par sood se, agar tum iman wale ho, aur agar tum aisa nahi karte to phir tum ko ailan-e-jang hai Allah ki taraf se aur is ke Rasul ki taraf se, aur agar tum sood lene se tauba karte ho to sirf apni asal raqam le lo, na tum kisi par ziyati karo aur na tum par koi ziyati ho, aur agar maqrooz tang dast hai to usay muhlat de do aday-i-gi ki taqat hone tak aur agar tum is se asal raqam bhi chor do to ye tumhare liye bahut hi behtar hai agar tum samjho. Aur is din se daro jis din tum sab Allah Ta'ala ki taraf lautaye jao ge. Phir har shakhs ko is ke kiye hue ka poora poora badla diya jaye ga. Aur un par kisi qism ki koi ziyati nahi ki jaye gi.“ Ibn Abbas (Radi Allahu Anhuma) ne kaha ke ye aakhri ayat hai jo Nabi Kareem (Sallallahu Alaihi Wasallam) par nazil hui
.

Hum se Abu-al-Walid Hisham Bin Abdul Malik ne bayan kiya, un se Shuba ne bayan kiya, un se Aun Bin Abi Juhayfa ne bayan kiya ke mein ne apne walid ko ek pacha-na lagane wala ghulam khareedte dekha. Mein ne ye dekh kar un se is ke mutaliq poocha to unhon ne jawab diya ke Nabi Kareem (Sallallahu Alaihi Wasallam) ne kutte ki qeemat lene aur khoon ki qeemat lene se mana farmaya hai, aap ne godne wali aur gudwane wali ko (godna lagwane se) sood lene wale aur sood dene wale ko (sood lene ya dene se) mana farmaya aur tasveer banane wale par lanat bheji
.