Aur Adda Bin Khalid (Radi Allahu Anhu) se riwayat hai unhon ne kaha ke mujhe Nabi Kareem (Sallallahu Alaihi Wasallam) ne ek bai-nama likh diya tha ke ye wo kaghaz hai jis mein Muhammad Allah ke Rasul (Sallallahu Alaihi Wasallam) ka Adda Bin Khalid se khareedne ka bayan hai. Ye bai musalman ki hai musalman ke hath, na is mein koi aib hai na koi fareb na fisq-o-fujoor, na koi bad-batini hai. Aur Qatada (Rahimahullah) ne kaha ke ghaila, zina, chori aur bhagne ki aadat ko kehte hain. Ibrahim Nakh'i (Rahimahullah) se kisi ne kaha ke baaz dalal (apne istabal ke) naam ”Aari Khurasan aur Sajistan“ (Khurasani istabal aur Sajistani istabal) rakhte hain aur (dhoka dene ke liye) kehte hain ke falan janwar kal hi Khurasan se aaya tha. Aur falan aaj hi Sajistan se aaya hai. To Ibrahim Nakh'i ne is baat ko bahut zyada nagowari ke sath suna. Uqba Bin Aamir ne kaha ke kisi shakhs ke liye bhi ye jaiz nahi ke koi sauda beche aur ye janne ke bawajood ke is mein aib hai ”khareedne wale ko is ke mutaliq kuch na bataye.“
.

Hum se Suleiman Bin Harb ne bayan kiya, kaha ke hum se Shuba ne bayan kiya, un se Qatada ne un se Salih Abu Khaleel ne, un se Ubaidullah Bin Harith ne, unhon ne Hakim Bin Hizam (Radi Allahu Anhu) se ke Rasul Allah (Sallallahu Alaihi Wasallam) ne farmaya, khareedne aur bechne walon ko is waqt tak ikhtiyar (bai khatam kar dene ka) hai jab tak donon juda na hon ya Aap (Sallallahu Alaihi Wasallam) ne ( «ma lam yatafarraqa» ke bajaye) «hatta yatafarraqa» farmaya. (Nabi Kareem Sallallahu Alaihi Wasallam ne mazeed irshad farmaya) pas agar donon ne sachayi se kaam liya aur har baat saaf saaf khol di to un ki khareed-o-farokht mein barkat hoti hai lekin agar koi baat chupa rakkhi ya jhoot kahi to un ki barkat khatam kar di jati hai
.