Aur Ibn Shihab se (Imam Malik Rahimahullah) ki riwayat hai, unhon ne Urwah Bin Zubair (Radi Allahu Anhu) se aur unhon ne Abdur Rahman Bin Abdul Qari se riwayat ki ke unhon ne bayan kiya mein Umar Bin Khattab (Radi Allahu Anhu) ke sath Ramzan ki ek raat ko masjid mein gaya. Sab log mutafarriq aur muntashir thay, koi akela namaz parh raha tha, aur kuch kisi ke peeche kharay hue thay. Is par Umar (Radi Allahu Anhu) ne farmaya, mera khayal hai ke agar mein tamam logon ko ek qari ke peeche jama kar doon to zyada accha ho ga, chunanche aap ne yehi thaan kar Ubayy Bin Ka'b (Radi Allahu Anhu) ko un ka imam bana diya. Phir ek raat jo mein un ke sath nikla to dekha ke log apne imam ke peeche namaz (tarawih) parh rahe hain. Umar (Radi Allahu Anhu) ne farmaya, ye naya tareeka behtar aur munasib hai aur (raat ka) wo hissa jis mein ye log so jate hain is hissa se behtar aur afzal hai jis mein ye namaz parhte hain. Aap ki murad raat ke aakhri hissa (ki fazeelat) se thi kyunke log ye namaz raat ke shuru hi mein parh lete thay
.