Aur is ne roza tod diya to todne wale par qaza wajib nahi hai jab ke roza na rakhna is ko munasib ho
.

Hum se Muhammad Bin Bashar ne bayan kiya, kaha ke hum se Jafar Bin Aun ne bayan kiya, un se Abu-al-Umais Utba Bin Abdullah ne bayan kiya, un se Aun Bin Abi Hujayfa ne aur un se un ke walid (Wahb Bin Abdullah Radi Allahu Anhu) ne bayan kiya ke Rasul Allah (Sallallahu Alaihi Wasallam) ne Salman aur Abu-al-Darda (Radi Allahu Anhu) mein (hijrat ke baad) bhai chara karaya tha. Ek martaba Salman (Radi Allahu Anhu), Abu-al-Darda (Radi Allahu Anhu) se mulaqat ke liye gaye. To (un ki aurat) Umm-e-Darda (Radi Allahu Anha) ko bahut praganda haal mein dekha. Un se poocha ke ye halat kyun bana rakki hai ? Umm-e-Darda (Radi Allahu Anha) ne jawab diya ke tumhare bhai Abu-al-Darda (Radi Allahu Anhu) hain jin ko duniya ki koi hajat hi nahi hai phir Abu-al-Darda (Radi Allahu Anhu) bhi aa gaye aur un ke samne khana hazir kiya aur kaha ke khana khao, unhon ne kaha ke mein to roze se hoon, is par Salman (Radi Allahu Anhu) ne farmaya ke mein bhi is waqt tak khana nahi khaoon ga jab tak tum khud bhi shareek na ho ge. Rawi ne bayan kiya ke phir wo khane mein shareek ho gaye (aur roza tod diya) raat hui to Abu-al-Darda (Radi Allahu Anhu) ibadat ke liye utthe aur is martaba bhi Salman (Radi Allahu Anhu) ne farmaya ke abhi so jao. Phir jab raat ka aakhri hissa hua to Salman (Radi Allahu Anhu) ne farmaya ke accha ab utth jao. Chunanche donon ne namaz parhi. Is ke baad Salman (Radi Allahu Anhu) ne farmaya ke tumhare Rabb ka bhi tum par haqq hai. Jaan ka bhi tum par haqq hai aur tumhari biwi ka bhi tum par haqq hai, is liye har haqq wale ke haqq ko ada karna chahiye, phir aap Nabi Kareem (Sallallahu Alaihi Wasallam) ki khidmat mein hazir hue aur Aap (Sallallahu Alaihi Wasallam) se is ka tazkira kiya. Aap (Sallallahu Alaihi Wasallam) ne farmaya ke Salman ne sach kaha
.