Aur Ibn Abbas (Radi Allahu Anhuma) ne kaha ke un ko mutafarriq dinon mein rakhne mein koi haraj nahi kyunke Allah Ta'ala ka hukm sirf ye hai ke ”ginti poori kar lo doosre dinon mein.“ aur Saeed Bin Musayyab ne kaha ke (Dhul Hijjah ke) das roze is shakhs ke liye jis par Ramzan ke roze wajib hon (aur un ki qaza abhi tak na ki ho) rakhne behtar nahi hain balkay Ramzan ki qaza pehle karni chahiye aur Ibrahim Nakh'i ne kaha ke agar kisi ne kotahi ki (Ramzan ki qaza mein) aur doosra Ramzan bhi aa gaya to donon ke roze rakkhe aur is par fidyah wajib nahi. Aur Abu Hurairah (Radi Allahu Anhu) se ye riwayat mursalan hai aur Ibn Abbas (Radi Allahu Anhuma) se manqool hai ke wo (miskeenon) ko khana bhi khilaye. Allah Ta'ala ne khana khilane ka (Quran mein) zikr nahi kiya balkay itna hi farmaya ke doosre dinon mein ginti poori ki jaye
.

Hum se Ahmad Bin Yunus ne bayan kiya, kaha ke hum se Zuhair ne bayan kiya, un se يحییٰ Bin Abi Kathir ne bayan kiya, un se Abu Salma ne bayan kiya ke mein ne Aisha (Radi Allahu Anha) se suna wo farmatein ke Ramzan ka roza mujh se chhoot jata. Shaban se pehle is ki qaza ki taufiq na hoti. Yahya ne kaha ke ye Nabi Kareem (Sallallahu Alaihi Wasallam) ki khidmat mein mashghool rehne ki wajah se tha
.