Aur Allah Ta'ala ne farmaya ”ae Iman walo! tum par roze isi tarah farz kiye gaye hain jis tarah in logon par farz kiye gaye thay jo tum se pehle guzar chuke hain taake tum gunahon se bacho.“
.

Hum se Qutaiba Bin Saeed ne bayan kiya, un se Ismail Bin Jafar ne bayan kiya, un se Abu Suhail ne, un se un ke walid Malik ne aur un se Talha Bin Ubaidullah (Radi Allahu Anhu) ne ke ek aarabi pareshan haal baal bikhre hue Rasul Allah (Sallallahu Alaihi Wasallam) ki khidmat mein hazir hua is ne poocha: ya Rasul Allah! bataiye mujh par Allah Ta'ala ne kitni namazein farz ki hain ? Aap (Sallallahu Alaihi Wasallam) ne farmaya ke panch namazein, ye aur baat hai ke tum apni taraf se nafal parh lo, phir is ne kaha bataiye Allah Ta'ala ne mujh par roze kitne farz kiye hain ? Nabi Kareem (Sallallahu Alaihi Wasallam) ne farmaya ke Ramzan ke mahine ke, ye aur baat hai ke tum khud apne taur par kuch nafli roze aur bhi rakh lo, phir is ne poocha aur bataiye zakat kis tarah mujh par Allah Ta'ala ne farz ki hai ? Aap (Sallallahu Alaihi Wasallam) ne usay shar-e-Islam ki baatein bata dein. Jab is aarabi ne kaha is zaat ki qasam jis ne aap (Sallallahu Alaihi Wasallam) ko izzat di na mein is mein is se jo Allah Ta'ala ne mujh par farz kar diya hai kuch barhaoon ga aur na ghataoon ga, is par Rasul Allah (Sallallahu Alaihi Wasallam) ne farmaya agar is ne sach kaha hai to ye murad ko pohanchaya (Aap Sallallahu Alaihi Wasallam ne ye farmaya ke) agar sach kaha hai to jannat mein jaye ga
.